Изложбата на Правниот факултет во Белград со наслов „Злосторства против цивилното население во Србија под бугарска окупација /1915-1918/“ е насочена против Бугарија, има јасна пропагандна цел и поттикнува екстремен национализам.
Ова го изјави директорката на Дирекцијата за „Југоисточна Европа“, Вања Андреева во разговорот со Славица Панич, привремен управител на амбасадата на Србија во Бугарија. Разговорот е воден по информацијата на БГНЕС за „научната изложба“ од 27 декември, која имаше за цел да го претстави бугарскиот геноцид врз Србите, бугарските воени злосторства, како и бугарските масакри врз Србите во Македонија.
Во разговорот со Панич, како што јавува БГНЕС, бугарската страна изразила силна загриженост за содржините на изложбата, дефинирајќи ги како „израз на агресивна пропаганда насочена против Бугарија и против развојот на добрососедските односи во регионот“. Бугарската страна потсетила и дека според заклучоците на Советот за проширување на ЕУ од 13 декември 2022 година, се очекува земјите кандидати за членство во ЕУ да вложат решителни напори за процесите на помирување и стабилност во регионот, вклучително и со надминување на наследството од минатото.
Бугарското Министерство за надворешни работи нагласило и дека „организирањето на настан во пресрет на новогодишните празници, насочено против Бугарија, има јасна пропагандна цел и поттикнување на екстремен национализам. Ние го прифаќаме неговото организирање како дел од агенда на одредени кругови кои работат против добрососедските односи меѓу Србија и Бугарија“.
Реакцијата на Бугарија оди дотаму и што очекува да биде информирана дали државните институции на Србија поддржале ваков настан, како што се потенцира, „насочен против развојот на добрососедските односи со Бугарија“.
Изложбата, инаку, беше поддржана, како што стоеше во материјалите, од Министерството за култура на Србија.
Извор: Нова ТВ
