Милиони луѓе излегоа на улиците низ САД и делови од Европа во масовни протести против актуелниот претседател на САД, Доналд Трамп, во рамки на движењето „No Kings“, кое организаторите го нарекуваат едно од најголемите во модерната американска историја.
Според нив, биле одржани повеќе од 3.100 настани во големи градови, предградија и рурални средини, а вкупниот број на учесници може да надмине девет милиони.
Протестите се насочени против, како што велат демонстрантите, авторитарниот стил на владеење на Трамп, строгите имиграциски политики, негирањето на климатските промени и војната со Иран.
Во Њујорк десетици илјади луѓе учествуваа на протестите, меѓу кои и актерот Роберт Де Ниро, кој го нарече Трамп „егзистенцијална закана за нашите слободи и безбедност“.
Во главниот град Вашингтон илјадници демонстранти маршираа кон Националниот мол, носејќи транспаренти со пораки како „Трамп мора да замине“ и „Борба против фашизмот“.
„Тој лаже и лаже и лаже, а никој ништо не прави. Ова е ужасна ситуација“, изјавил еден од демонстрантите.
Протестите уште еднаш ја истакнаа силната политичка поларизација во САД.
Додека Трамп ужива силна поддршка од движењето „Make America Great Again“, неговите противници го обвинуваат за владеење преку извршни наредби, користење на правосудниот систем против политички противници и за укинување на програми за расна и родова еднаквост.
Дополнително, критики има и за неговата енергетска политика и поддршката за фосилните горива.
Од Белата куќа ги отфрлија протестите, оценувајќи ги како „производ на левичарски финансиски мрежи“ без вистинска јавна поддршка.
„Единствените што се грижат за овие ‘терапевтски сесии за Трамп синдром’ се новинарите кои се платени да ги покриваат“, изјавила портпаролката Абигејл Џексон.
Слична порака испрати и Републиканскиот конгресен комитет, оценувајќи ги протестите како „собири на екстремната левица“.
Демонстрации се одржаа и во европски градови како Амстердам, Мадрид и Рим, каде илјадници луѓе протестираа под засилено полициско присуство.
Во Париз се собрале неколку стотици демонстранти, главно Американци кои живеат во Франција, заедно со синдикати и организации за човекови права.
„Протестирам против сите незаконски, неморални и бескрајни војни на Трамп“, изјавила организаторката Ада Шен.
Во Лондон, протестите биле насочени и против војната во Иран, со пораки против екстремната десница и расизмот.
Движењето „No Kings“ во изминатата година се позиционира како најгласна опозиција против Трамп, со масовни протести во јуни и октомври 2025 година.
Во пресрет на ноемвриските избори и со пад на рејтингот на претседателот под 40%, политичките тензии во САД се очекува дополнително да се засилат.
Редакциај Фронтлајн
