Руската агресија врз Украина продолжи изминатава ноќ со лансирање на дронови-камикази на северот и југоистокот на земјата. Вкупно 16 дронови биле соборени од украинската противвоздушна одбрана изминатава ноќ, од кои седум биле пресретнати во околината на Кијив и во самиот град, додека преостанатите биле соборени во Днипропетровскиот и Запорижшкиот регион, пренесува Гардијан.
Алармот за противвоздушна одбрана во Кијив се вклучил среде ноќта, при што противвоздушната одбрана на Украина дејствувала и уништила вкупно седум дрона што биле лансирани врз главниот град. Остатоците од еден од дроновите паднале врз административна зграда во населеното место Холосиев во Кијивскиот регион, при што била погодена и оштетена административна и станбена зграда.
Ирански дронови „Шахед“ биле соборени од противвоздушната одбрана на Украина и во Днипропетровск и Запорижја, но притоа не се забележани загинати и повредени лица во нападите, пренесува Укринформ.
Украинските власти објавија конечни официјални резултати во однос на вчерашните ракетни напади извршени од Русија врз цивилни цели во земјата. Украинската армија соопшти дека Русија лансирала вкупно 69 проектили од копно, море и воздух, од кои 54 биле пресретнати и уништени од противвоздушната одбрана. Главна цел на нападите била енергетската инфраструктура од Харкив на исток до Лвив на западот на Украина.
Во меѓувреме, на фронтот продолжуваат борбите меѓу руските и украинските сили во Донбас. Жестоки борби се водат околу населените места Кремина во Луханскиот регион и Бахмут во Донецкиот регион. Еден цивил загинал како последица на руските напади врз градот Бахмут, пренесува Укринформ. Херсонскиот регион изминатово деноноќие бил ракетиран во 81 наврат, при што регионалниот центар Херсон бил гаѓан 27 пати во текот на денот и било повредено едно лице.
Украинските власти ги објавија и своите податоци за бројот на загинати руски војници од почетокот на воената агресија врз нивната земја. Тие тврдат дека Русија досега изгубила 105.250 војници во Украина, додека само во изминативе 24 часа загинале 690 руски војници долж фронтот долг над 1.000 километри. Најголеми загуби руските сили претрпеле во Бахмут и Лиман, пишува Укринформ. Ваквите податоци на двете спротивставени страни за бројот на загинати војници засега не можат да бидат потврдени од независни извори.
Од почетокот на руската воена агресија на 24 февруари годинава, во Украина биле оштетени над 2.600 објекти на образовни институции, додека 406 зданија биле целосно уништени како резултат на руските напади, пренесува Укринформ. Овие податоци ги обелодени украинското Министерство за образование и наука. Инаку, во моментов функционираат 12.902 школи на териториите под контрола на украинските власти.
Извор: Мета
