Премиерот Риши Сунак денеска ќе се сретне со водечките луѓе во англиското здравство бидејќи земјата минува низ многу тешка зима поради ширењето на грипот и Ковид-19, како и штрајкот на здравствените работници кои тврдат дека високата инфлација им ги намалила платите, објави Ројтерс.
Возилата на брзата помош често чекаат во редици пред болниците за да ги предадат пациентите на одделенијата за итни случаи. За тоа време, лекарите и медицинските сестри се соочуваат со недостиг на персонал, поради што се принудени да отпуштат дел од пациентите.
Од кабинетот на премиерот велат дека на форумот на Националната здравствена служба (НХС) ќе се разговара за четири прашања, меѓу кои и организацијата на итната медицинска помош. Портпарол на премиерот додава дека клучните цели се да се намали притисокот врз болниците и поефикасно да се управува со НХС на долг рок.
Затоа ги собираме најдобрите експерти од областа на здравството и социјалната заштита, со цел размена на знаења и практични решенија, поради соочување со најважните предизвици пред нас, истакна портпаролот. Сепак, Даунинг стрит не го споменува прашањето за платите.
Во последните неколку месеци штрајковите на работниците ширум Британија доведоа до голем број проблеми во различни сектори, вклучувајќи го и здравствениот сектор, и можат да продолжат со оглед на зголемената инфлација што се појави по повеќе од една деценија стагнација на растот на платите.
Членовите на Конзервативната партија очекуваат Сунак да понуди повисоки плати на здравствениот персонал, а премиерот оваа недела изјави дека намалувањето на листата на чекање во болниците е еден од петте приоритети во 2023 година. Но, ќе биде потребно повеќе време за да се исполни наведената цел.
Владата најави 500 милиони фунти дополнително финансирање за НХС, но опозициските лабуристи велат дека таквиот потег „дојде предоцна и нема да доведе до значителна разлика оваа зима“. Статистиката минатата недела покажа дека бројот на случаи на грип се зголемил за речиси 50 отсто, предизвикувајќи рекордна побарувачка за лекари и здравствени установи, предупредија челниците на НХС.
Во последната недела од 2022 година, повеќе од 90 проценти од болничките капацитети беа пополнети, додека 13.000 кревети дневно зафаќале пациенти кои се здравствено способни да бидат отпуштени.
Знаевме дека оваа зима ќе биде една од најтешките во историјата, изјави директорот на НХС, Стивен Пауис, додавајќи дека дополнителни 7.000 кревети ќе бидат достапни до март.
