И вчера нови закани за експлозивни направи во повеќе училишта низ државата, информираат од МВР.
Во Министерството за внатрешни работи било пријавено дека на електронските адреси на 16 училишта во Скопје и четири училишта во Прилеп е упатена закана за поставена експлозивна направа.
Во 18.30 часот вчера завршија сите потребни проверки во врска со пријавите и утврдено е дека станува збор за лажни пријави.
Од 26 октомври лани, анонимните пораки за поставени бомби во земјава најпрвин почнаа да стигнуваат до основните и средните училишта речиси секој ден во работните денови, а мета станаа и трговски и деловни центри, државни институции, спортски објекти, полициска станица и Меѓународниот аеродром Скопје.
Како одговор на тоа, Владата веќе формира оперативен тим за сајбер безбедност и хибридни закани со кој ќе раководи Бирото за јавна безбедност во рамки на Министерството за внатрешни работи (МВР).
За само година и половина имаме засилување на хибридните закани и напади, не само во Северна Македонија туку и во државите во регионот, кажа министерот за внатрешни работи Оливер Спасовски во гостувањето во ТВ Шења.
-Такви се заканите и до училиштата, да создаваат чувство на страв. Но, тука државата покажа капацитет за да се сочува мирот и стабилноста. Пораките што тука ги добиваме, односно училиштата, се исти со тие од регионот, во Хрватска, во Србија, во Црна Гора, во Босна и Херцеговина и други, дури и текстот е идентичен само на друг јазик. Тоа значи дека има еден центар на моќ кој сака овој регион да го доведе во ниво на неспокој. Сите капацитети се ставени во функција. Соработуваме и со Интерпол и Европол, сите до еден се вклучени во процесот. Имаме сериозен проблем во детекцијата, бидејќи се користи ВПН-мрежата и тешко се доаѓа до ИП-адресата, па затоа ова е транснационален криминал, не можеме да дознаеме кој го прави, но знаеме зошто го прави – за да се спречат сите процеси за земјата и во
регионот, кажа Спасовски.
