Огромен број твитови на македонските твитерџии минатата година беа посветени директно на руската пропаганда, добар дел од твитовите служеа за пројава на нашиот национализам, а дел беа насочени против министерката за одбрана и нашата поддршка на Украина, изјави Андреја Стојковски од „Преспа институт“ во емисијата СТУДИО 10 на ТВ 24.
Според Стојковски, има петмина луѓе кои се заслужни за 15% од информациите посветени на една од 11-те најактуелни теми меѓу кои втората е војната на Русија против Украина.
-Тие петмина луѓе пишуваат или пренесуваат информации, но имаат многу мал досег со меѓу 2-8 допаѓања и просечно две споделувања. Тоа значи дека тие не се обидуваат да остварат освојување на просторот туку сакаат да извршат влијание оти твитот се појавува и не е нужно некој да реагира, вели Стојковски.
