Раководствата на Србија и Косово се очекува да го прифатат европскиот предлог за сеопфатно решавање на нивните меѓусебни односи, вклучително и спроведувањето на договорот за Заедницата на српски општини, изјави висок функционер на ЕУ задолжен за подготовките за новата рунда дијалог в понеделник во Брисел, јави Бета.
Српскиот претседател Александар Вучиќ и косовскиот премиер Албин Курти нема да разговараат за содржината на предлогот на средбата со високиот претставник на ЕУ Жозеп Борел и посредникот на ЕУ Мирослав Лајчак, туку ќе разговараат за спроведувањето на „европскиот, германско-францускиот предлог“, изјави за новинарите во Брисел европскиот претставник.
Содржината на предлогот е одредена во анексот, а ЕУ во рок од неколку месеци би ја контролирала неговата примена преку механизмот за мониторинг, а целта е да се постигне „сеопфатен правно обврзувачки договор за нормализација на односите“ меѓу Белград и Приштина.
Тој додаде дека станува збор за основен, прилично сеопфатен договор кој во многу аспекти има елементи на „севкупен правно обврзувачки договор за нормализација на односите меѓу двете страни“.
Новинарите не добија јасен одговор од овој функционер дали ЕУ смета дека конечниот договор за регулирање на односите меѓу Белград и Приштина, во кој треба да биде инкорпорирана и ЗСО, ќе биде и некакво признавање на автономијата и независноста на Косово од Белград, наведува Бета.
Високиот претставник на ЕУ нагласи дека имплементацијата на европскиот предлог ќе значи и нови западни проекти и инвестиции, значително ќе ја зголеми финансиската помош и ќе доведе до поголема безбедност и предвидливост, кога се во прашање Србија и Косово, како и регионот.
