Двете главни владејачки партии во Северна Македонија, СДСМ и албанската партија ДУИ и македонската опозиција, денеска ја отфрлија идејата на албанската опозициска партија, Алтернатива, за формирање на Заедницата на албанските општини, оценувајќи ја како неприфатлива и несериозна.
Вчера Алтернатива ги повика партиите на Албанците кои имаат власт во општините, ДУИ, Алијанса за Албанците и Беса, да покренат иницијатива за формирање Заедница на албански општини во Северна Македонија, како реципроцитет на она што меѓународната заедница бара од Косово да основа Заедница на српски општини.
СДСМ порача дека ситуацијата на Косово не може никако да се преслика во Северна Македонија и дека соработката со општините е апсолутно можна, согласно законот.
– Секоја општина може да соработува во која било форма, кога ќе најде интерес за одредена тема. Сметаме дека ова барање е несериозно, треба да се искористи за добивање политички поени и во крајна линија е неприфатливо – изјави Санела Шкријељ од СДСМ.
Најголемата албанска партија ДУИ, партнер на СДСМ во Владата, оцени дека предлогот на Алтернативата за формирање Заедница на албански општини е антиевропски и антиамерикански и штетен за конечното решение на косовското прашање.
-Патетично, антиамериканско и антиевропско, тоа е штетно за конечното решение на косовското прашање. Неуспешен обид за опстанок на политичката сцена по фијаското – порачаа од ДУИ за Алтернатива, која пред неколку дена ја напушти владата на Ковачевски поради влезот на Алијансата за Албанците.
Идејата на Алтератива е неприфатлива и за лидерот на најголемата македонска партија ВМРО-ДПМНЕ, Христијан Мицкоски, кој оцени дека Охридскиот договор е доволен и додаде дека таквите идеи можат само да ги влошат меѓуетничките односи.
