Цената на природниот гас на европските берзи доживеа нов пад. Според индексот ТТФ на најголемата европска берза за гас во Холандија, отсега за еден мегават час се тргува меѓу 41 и 43 евра. Во меѓувреме, компанијата Макпетрол која е увозникот на природен гас за месец март во земјава, го продава гасот на државата 20 евра поскапо, односно за 60,10 евра по мегават час без ДДВ.
Токму Макпетрол, како и телевизијата Телма, беа најголемите критичари на решението да се увезува гас по фиксна цена, иако ваквата одлука носи предвидливост на пазарот, што беше важен услов за властите.
Макпетрол дури реши и да не учествува на јавните повици, па оттука бугарската компанија „Балкан Јутилитис“ се јавуваше како најповолен доставувач. Оваа компанија, но и Владата, беа цел на напади од страна на Макпетрол, но и медиуми, во кои се тврдеше дека нивната променлива цена е поприфатлива варијанта и дека државата ќе плати поскапа цени доколку ја одбере бугарската фирма. Во едно од своите соопштенија од Макпетрол дури истакнаа дека „секогаш кога постојат предизвици, компанијата е подготвена преку разговори да се стигне до решение кое што ќе биде издржано, односно чии евентуални недоследности нема да паднат на грбот на увозниците, но и на крајните корисници на природен гас во земјата“.
Па токму сега кога паѓаат цените на европските берзи за природен гас се отвора прашањето дали под притисок од јавноста и од Владата Макпетрол како општествено одговорна компанија (каква што се претставува) ќе се откаже од мал дел од својот профит и во услови на енергетска криза ќе застане позади граѓаните и компаниите корисници на гас?
Инаку, во февруари ЕСМ соопшти дека ќе набавува гас од Макпетрол за месец март, бидејќи домашната компанија на тендерот, понуди најповолна цена од 60,10 евра по мегават час без ДДВ. Станува збор за количини од 1.200 до 2.300 мегават часа гас дневно кои се наменети за потребите на топланите Исток, Запад, Енергетика и Скопје Север, како и за стопанските субјекти кои се снабдуваат преку ЕСМ продажба. На тендерот, покрај Макпетрол, се јавија и компаниите „Балкан Јутилитис“ и „Акта ЕЛ“.
Од Макпетрол, пак, соопштија дека како општествено одговорна компанија се јавиле на тендерот на ЕСМ Продажба заради заштита на државниот буџет, кој, како што додадоа, со последните два тендера за набавка на гас за јануари и февруари бил оштетен од државната компанија ЕСМ, бидејќи биле склучени договори поради кои државата во јануари и февруари плаќала за овој енергенс и до 70% повисока цена од берзанската. Сега пак, со тоа што Макпетрол во месец март нуди повисока цена за мегават час од берзанската за повеќе од 30 проценти и со тоа остварува повисоки профити, се наметнува дилемата дали компанијата останува на зборот и дали можеби ќе се откаже од дел од заработувачката во полза на државата и граѓаните.
Инаку, во текот на 2022 година Макпетрол АД Скопје оствари позитивни резултати, односно солиден раст на приходите и на добивката, информираше компанијата преку Македонската берза.
-Во текот на 2022 година Макпетрол оствари вкупен приход во износ од 37,6 милијарди денари, кој е поголем од минатогодишниот за 15,13 милијарди денари, односно остварен е раст од 67,29%. Во структурата на приходите, најголем удел со 98,79% имаат приходите од продажба, од кои 93,33% се остварени преку продажба на домашен пазар, а само 5,46% се остварени преку продажба на странски пазар.
