Четири неверојатно талентирани млади актерки ќе се појават повторно на сцената во четврток на 27. април, за да изведат микс од добро познати диско музички хитови, преплетени со стенд ап настапи, кои подеднакво ќе го расположат и женскиот и машкиот дел од публиката.
Актерките кои ги краси исклучителен вокален и актерски талент, тоа веќе го докажаа во претходните изданија на „Girls Night”, а дел од нив и на минатонеделното издание на „Глумците пеат”. Овој тим од четири неуморни актерки на сцена ја пренесуваат исконската музика со најголемите диско и клупски хитови почнувајќи уште од 80-тите, предизвикувајќи ги присутните да пеат и да танцуваат заедно со нив. Тие имаат подготвено и одлични комични текстови со кои ќе ве натераат да се смеете до солзи.
Иако овој настан привлекува голем број на женска публика, пред се поради насловот, машките посетители кои сакаат добра и несекојдневна забава уживаат во иста мера. Со врвната музичка изведба и комедијата која сигурно ќе му се допадне на секој присутен, овој настан е задолжителен за секој кој е во потрага по добро место за забава во четврток навечер.
„Искуството од претходните изданија ни вели дека скопјани сакаат поинаков тип на забава. Овој настан е направен „по мерка“ на танц, глума и музика, од друга страна на оваа забава уживаа сите генерации.“, велат од продукцијата.
Вратите во Public Room се отворени во четврток од 21:00 часот, а билетите се достапни на барот во Public Room. Поради големиот интерес од публиката, препорачливо е да истите да се обезбедат навреме, или да се изврши претходна резервација.
Придружете ни се за една ноќ на смеа, музика и забава со неверојатните млади актерки: Нина Елсезер, Ангела Стојановска, Надица Петрова и Бонита Стеви.
Оваа сценска фузија од музика, кабаре, стенд ап и караоке е во продукција на Public Room, а стилист е Сашка Павловска.
