Владата на денешната седница донела повеќе заклучоци во делот на превентивата и безбедноста во училиштата.
На сите основни и средни училишта преку општините и Град Скопје им се препорачува да формираат стручни тимови на ниво на општина во соработка со стручните служби на меѓуопштинските центри за социјална работа. Фокусот на работа на овие тимови е предвидено да бидат разговори – поединечно со секое дете/ученик во училиштето. Исто така, им се препорачува да одржат состаноци со сите родители за подобрување на процесите, безбедноста, организацијата и состојбите во училиштата.
Препораката на Владата се однесува посебно на задолжување на директорите на основните и на средните училишта, да организираат состаноци на училишните одбри и на советите на родители, како и родителски средби. На овие состаноци е предвидено да се разговара за взаемните одговорности околу превентивните мерки за заштита на учениците во училиштата, со посочувања на одредбите од Законот за семејство и од Кривичниот закон, во функција на безбедноста на учениците.
– Владата им укажува и препорачува на општините/Град Скопје, да ги задолжат директорите на основните и средни училишта, да направат организација и протокол за начинот на користење на мобилните телефони на учениците и наставниците, за време на часовите и во просториите на училиштата. Се посочува дека користењето мобилни телефони во училниците е потребно да се ограничи, со цел да се поттикне дискусија, размена на идеи, отворени разговори, фокусирање на содржината на учење, се наведува во соопштението од владината прес-служба.
Се препорачува во кризни ситуации, училиштето да остане безбедно место во кое што учениците ќе најдат разбирање, одговори и поддршка за да ги надминат предизвиците, да ги унапредат своите социо-емоционални компетенции и да ја зајакнат психолошката отпорност. Приоритетна цел на разговорите во училиште, како што се осочува, треба да биде смирување на несигурноста и чувството на безбедност во училиштето и нивно адресирање на афирмативен начин.
Им се препорачува на општините да ги задолжат директорите на училиштата да обезбедат просторини услови за стручните соработници.
Целта, како што посочуваат од Владата, е целосна отвореност кон учениците и доколку имаат потреба, закажување тет – а – тет средба, со својот училиштен психолог.
Меѓу владините заклучоци, предвидено е и Министерството за образование и наука во соработка со Бирото за развој на образованието да изготват листа на ресурси за коишто ќе се дискутира на одделенски/класен час, меѓу класните раководители и децата/учениците, за унапредување на добросостојбата на учениците. Ова, како што е наведено во соопштението од владината прес-служба, се однесува на прирачници за животни вештини, околу Програмата за психосоцијална помош и поддршка во унапредување на добросостојбата и менталното здравје на децата и младите во образовните, здравствените и загрижувачките институции и средини и слично.
Препорака од Владата до општините е дополнително да се зајакнат превентивните програми за промоција на добросостојба на учениците, заштита од насилство, злоупотреба и запуштање, спречување дискриминација, соработка со родителите односно старателите и други активности.
Министерството за образование и наука ќе треба да формира работна група чија задача ќе биде креирање протокол за советодавна работа, при обезбедување поддршка за психосоцијално и ментално здравје на учениците во основните и средни училишта. Работната група треба да биде составена од стручни соработници во основните и средните училишта, претставници на Сојузот на средношколци, универзитетски професори, Бирото за развој на образованието и Државниот просветен инспекторат.
