„Потребен е широк партиски и општествен консензус за промена на уставот со внесување на Бугарите како малцинство покрај другите веќе споменати, со што ќе се амортизираат тензиите од спротивставените ставови, ќе се обезбеди поголема кохезија која би требало да ја намали франатичната поларизација и раслојување во општеството“ препорача Фани Каранфилова Пановска на трибината „МК во ЕУ до 2030“ во Куманово.
Таа додаде дека исто така е потребно зајакнување на структурите и создавање на нови во рамки на институциите за имплементирање на Договорот за добрососедство со Бугарија и особено на протоколот за да се гарантира незавидно ниво на разбирање на проблематиката за заштита на идентитетските и историските прашања.
„Владата мора најитно да ја пополни, доекипира и формализира преговарачката структура согласно одлуката за нејзината поставеност и да го формира преговарачкиот тим, како и да го формализира составот на работните групи по поглавјата. Учеството на граѓанското општество во работните групи по поглавја согласно моделот предложен од Советот за соработка помеѓу Владата и граѓанското општество мора да се обезбеди на транспарентен и инклузивен начин“ рече Каранфилова Пановска.
Таа препорача дека се потребно и сериозни напори и јакнење на капацитетот на институциите за максимално искористување на средствата од ИПА III и од Програмите на Унијата, што во реалност значи конзистентно и консеквентно антиципирање на реформската агенда за која ќе биде потребна финансиска, но и поддршка во know-how од ЕУ и адекватно програмирање на помошта за да биде навремена и ефикасно искористена.
