Кога Македонија е зафатена од афрички топлотен бран со температурен шок кој во урбаните средини се најавува дека ќе достигне 45 степени целзиусови, Велес ќе останел без комуналната служба, истакна на прес-конференција претседателката на СДСМ Велес, Даница Чадиева.
Таа смета дека во ваква состојба градот го довеле градоначалникот Марко Колев и директорот на ЈКП „Дервен“ Горан Наунчев кои одлучиле во името на велешани да ги честат скопјани и со парите на граѓаните на Велес да го исчистат Скопје од смет.
„Не знам врз основа на кое овластување и врз основа на кој закон ќе го остават Велес, кој и така не може да се пофали со градска чистота, да се гуши во ѓубре, смрдеа и зараза. Дали овластувањата и заканите на Мицкоски за лични пресметки со непослушните одат до тој степен што го заматуваат здравиот разум на послушниците? Дали ова орвелово раководење на „Големиот брат“ сакаат да го применат и во Велес? Велес се уште не е протекторат, а велешани не се заморчиња. Ако комуналните служби не се појават по утврдениот распоред на градските улици и не го соберат сметот, нема да ги платиме сметките на „Дервен“, намалени за соодветен надоместок,“ рече Чадиева на вчерашната прес-конференција.
Таа праша „Нели господата од ВМРО ќе работеа во интерес на сите граѓани, или да го употребам речникот на градоначалничката на Скопје со нас раководи шпицестиот градоначалник?“
„Господа Марко Колев и Наунчев. Освестете се и преслушајте се. Интересите на граѓаните пред интересите на партијата. Имате ли средства во буџетот за вонредни трошоци на скапите камиони за транспорт на контејнерите, за прекувремена работа на вработените, за дополнително ангажирање на работници?
Ако мислите тоа да го платат граѓаните на Велес – нема да може!“, истакна на пресот Чадиева.
Таа им порача на општинските власти дека „СДСМ Велес будно ќе го следи секој Ваш чекор и секогаш е тука да ги заштити интересите на овој град, а начинот и следните чекори ќе зависат од Вашите постапки“.
