Парламентарното мнозинство предводено од СДСМ денеска ги усвои измените на Законот за облигациони односи, како и Законот за извршување со кои повеќе нема да може каматата да биде повисока од долгот, соопшти владејачката партија.
Овие измени кои доаѓаат по бројни реакции од граѓаните до пратениците, ќе овозможат кога износот на стасаната, а неисплатена казнена камата ќе го достигне износот на главнината, таа да престане да тече.
Го прекинуваме т.н. “должничко ропство“, односно со усвоените законски измени драстично се намалуваат вкупните трошоци за брзите кредити. Со усвоените измени на Законот за финансиски друштва вкупните трошоци на земен т.н брз кредит не може да бидат поголеми од 60% од кредитот. Со ова ја прекинуваме праксата со која за кредит од 10.000 денари граѓаните досега враќаа и по 70.000 денари, се додава во соопштението.
Дополнително, се скратува и рокот за застареност од 10 на 5 години од правосилноста на одлуката.
Според СДСМ, со ваквиот потег се штитат граѓаните и се става крај на праксата тие да плаќаат и до 10 пати поголем износ отколку што навистина должеле, како што тоа беше случај често пати досега.
Исто така, по 30 години лицата со посебни потреби целосно се ослободуваат од партиципација во јавните здравствени институции.
Пратениците од ДПМНЕ и Левица кои секојдневно глумат загриженост за граѓаните, не гласаа за овие законски измени и уште еднаш како и многу пати до сега се ставија на спротивната страна од интересите на граѓаните.
