„Верувам дека со сериозни активности, со сериозно посветено работење, но пред се со транспаретност и доловување на она што го работи царинската управа, ќе ја доближиме институцијата до граѓаните. Кога ќе ја доближиме и кога ќе знаат од прва рака што работиме на дневна основа и како работиме, перцепцијата ќе почне да се менува, истакна Стефан Богоев, директор на Царинската управа на интервју за Фронтлајн.
Тој додаде дека е свесен дека перцепцијата кај дел од јавноста не е добра, и покрај тоа што царинската управа во минатото има направено многу сериозни работи и помогнато на стопанството, особено во делот на партнерство со компаниите, дигитализација, безхартиени постапки, поедноставени постапки, овластен економски оператор, зелени коридори, „Опен Балкан“, односно серија на активности спроведени уште пред него.
„Вчера бев на настан на Макам Транс. Навистина има транспортери, има увозници и компании коишто се задоволни и коишто имаат одлична соработка со царинската управа. Овде навистина се спроведени чекори и активности и реформи коишто се во интерес на компаниите. Опен Балкан иницијативата има за цел да ги направи нашите компании да имаат помали трошоци и со тоа да бидат поконкурентни на меѓународните пазари. Тоа во добар дел е успеано. Во делот на Оне стоп шоп премини, со едногранична контрола како што направивме сега на Ќафасан, претходно на Табановце, како што биде направено на Блаце на почеток на идната година Истото повторно ја подобрува конкурентноста и е во функција на стопанството и компаниите“, истакна Богоев.
Тој информираше дека компаниите можат да добијат статус на овластен економски оператор што добиваат забрзани и поедноставени процедури. А намалувањето на времето кај компаниите, особено кај транспортните и кај увозниците и извозниците, значи заштеда и нов камион, нова тура. На тој начин стануваат поконкуретни на надворешните меѓународни пазари и толку повеќе ќе плаќаат даноци во државата и ќе вработуваат луѓе.
„Сепак стои во јавноста онаа горчина за царинската управа. Најчесто поради минатото се спомнува како извор на корупција, шверц и слично. Но, ова се перцепции, за жал, градени аргументирано или неаргументирано со децении. Преку ноќ нема да ја смениме перцепцијата, меѓутоа сериозно почнавме да работиме на менување на перцепцијата на царинската управа за да биде партнер на стопанството и сервис на граѓаните“, заклучи Богоев.
