Во рамки на турнејата низ земјите од Западен Балкан, заменик министерот за надворешни работи на Украина, Јевген Перебијнис денеска престојуваше во работна посета на Република Северна Македонија, каде што одржа средби со вицепремиерката задолжена за политики за добро владеење, Славица Грковска, министерката за одбрана, Славјанка Петровска и државниот секретар во МНР, Филип Тосевски.
Перебијнис со македонските партнери дискутираше околу начините за натамошно продлабочување на билатералниот политички дијалог, за интеракцијата на двете земји во рамки на меѓународните организации, како и за учеството на Северна Македонија во спроведувањето на низа меѓународни иницијативи на Украина – Формулата за мир на претседателот Володимир Зеленски и Меѓународната Кримска платформа.
„Ја осудивме руската агресија врз Украина уште од самиот почеток, а нашата поддршка не е само политичка, туку може да се види и на дело. Во повеќе наврати Северна Македонија донираше хуманитарна и воена помош за Украина која има целосно право да се одбрани од неиспоровоцираната руска агресија“, рече министерката за одбрана.
Петровска потенцираше дека Северна Македонија заедно со сојузниците останува во поддршка на Украина сè додека е потребно, бидејќи тоа е страната на правдата и вистината.
Тој со претставниците на македонската Влада детално дискутираше и за прашањето за европската интеграција на двете држави како земји кандидати за членство во Европската унија, како и за натамошна размена на искуства во оваа област. Одделно, страните разменија мислења во врска со пристапот на Украина во НАТО и натамошната поддршка од страна на Северна Македонија на овој пат.
Јевген Перебијнис изрази благодарност до македонската страна за приклучувањето кон Основната група (Core group) за создавање на Специјалниот трибунал за злосторствата и агресијата против Украина, како и за политичката, хуманитарната и воено-техничката помош што ѝ се обезбедува на Украина.