Франција ги забранува пропалестинските протести бидејќи тие најверојатно ќе го нарушат јавниот ред и мир, изјави францускиот министер за внатрешни работи Жералд Дарманен во писмо до префектурите низ целата земја.
Претходно оваа недела, Хамас ги повика муслиманите низ светот да протестираат в петок за поддршка на Палестинците поради крвавиот конфликт со Израел.
Француската полиција ги чува домовите на водечките пратеници, вклучително и претседателот на Националното собрание Јаел Брон-Пива и пратеникот Мејер Хабиб, во услови на зголемени стравувања од антисемитско насилство предизвикано од војната на Израел со Хамас.
Претседателот на француското собрание, кој е член на партијата Преродба на претседателот Емануел Макрон, добил смртни закани.
Од саботата, француската полиција евидентирала повеќе од 100 антисемитски акти, но тоа се главно графити, рече Дарманен, наведувајќи дека најмногу има повици за убивање Евреи. Според него, имало некои посериозни дела, вклучително и спречување на вооружени мажи да влезат во еврејски објекти, објави претходно Си-Ен-Ен.
Францускиот претседател Емануел Макрон денеска го повика Израел на „цврст“, но „праведен“ одговор по „терористичкиот напад“ од Хамас, кој францускиот лидер го опиша како „ослободување апсолутна суровост“ против еврејската држава, што однесе повеќе од 1.200 животи.
– Единствениот одговор на тероризмот, единствениот можен, е секогаш цврст и праведен одговор, цврст затоа што е фер, рече Макрон во телевизискиот говор.
– Израел има право да се брани со елиминирање на терористичките групи, вклучително и Хамас, преку целни акции, но и со зачувување на животите на цивилното население, бидејќи тоа е должност на демократијата, истакна францускиот претседател.
Макрон соопшти дека 13 француски државјани биле убиени од палестинските исламисти во нападот врз Израел на 7 октомври и вети дека ќе стори сé што е можно за да ги врати преостанатите 17 негови сонародници, чија судбина не е позната.
Францускиот претседател во своето обраќање го нарече Хамас терористичка организација која сака уништување на израелскиот народ и додаде дека единствениот начин за решавање на кризата е давање безбедносни гаранции за Израел и создавање палестинска држава.
