Додека војната меѓу Израел и Хамас се заканува да се прелее во поширокиот регион, некои корисници на социјалните мрежи тврдат дека соседните земји му објавиле војна на Израел, вклучувајќи ги Турција и Иран.
Видеото на кое наводно се гледа како Турција движи воен брод кон Газа за да ги одбрани Палестинците од израелските напади, беше широко споделено на социјалната медиумска платформа Х, (порано Твитер), во текот на изминатите неколку дена.
„Турција придвижи воен брод кон Газа бидејќи тие рекоа дека ќе ја бранат Газа од Израел затоа што тензиите на Блискиот Исток се зголемуваат. Ова станува интересно“, пишува во еден Твит.
Тврдењето доаѓа откако турскиот претседател Реџеп Тајип Ердоган на 25 октомври рече дека Хамас не е терористичка организација и го откажа планираното патување во Израел, што ги влошува веќе постоечките тензии меѓу Анкара и Ерусалим.
Со пребарување на обратна слика, откривме дека видеото е погрешно опишано. Оригиналното видео беше објавено на YouTube пред десетина години.
На него се гледа беспилотно американско борбено летало кое врши тест за летање и слетување на воен брод.
Во погрешното видео, логото на Си-Ен-Ен беше додадено за да ги измами корисниците на социјалните мрежи да веруваат дека тоа е легитимна вест.
За аудиото, откривме дека е исто така извлечено од вистински вести од WION, канал за вести на индиско-англиски јазик, со уредени некои клучни детали.
Во соопштението, Дирекцијата за комуникации на турското претседателство, исто така, ги негираше наводите изнесени во извештајот за лажни вести.
„Наводите изнесени од различни објави на социјалните мрежи преку снимки на кои се гледа „турски воен брод на пат кон Палестина“ е невистинито“, напиша портпаролот на владата.
Не, Иран не подигна црно знаме како „повик за војна“
Второто вирусно тврдење што го видовме широко споделено на X, е дека Иран исто така му објави војна на Израел.
Многумина споделија слики од црно знаме кое се вее над златната купола на иранскиот светилиште Имам Реза – свето место за шиитските муслимани лоцирано на североистокот на земјата.
„Ова е повик за војна или одмазда“, рече еден корисник на „блу-тик“ X, познат по ширењето теории на заговор.
„Црното знаме е подигнато над светилиштето на Имам Реза во Иран за прв пат во историјата… Ова ги има сите карактеристики на Третата светска војна“, пишува друг.
Но, по некое копање, излегува дека ова црно знаме не е повик за одмазда или војна. Всушност, на Фејсбук страницата на светилиштето, тоа е опишано како „огнено знаме“ кое беше подигнато како одговор на смртоносната експлозија што ја потресе болницата во Газа на 17 октомври.
И за разлика од она што овие корисници на социјалните мрежи го тврдат, не е прв пат храмот Имам Реза да го подига црното знаме.
Црното знаме се подига секоја година за да се одбележи периодот на жалост за имамот Хусеин, внукот на пророкот Мухамед, јавуваат иранските државни медиуми.
Во април 2023 година, светилиштето го подигна истото црно знаме со цел да го одбележи имамот Али, кој исто така се смета за маченик во шиитскиот ислам.
Извор: Еуроњус
Подготви: А. В. / Нова ТВ
