Иранската добитничка на Нобелова награда за мир Наргес Мохамади, која издржува казна затвор, е пренесена во болница на кардиолошки прегледи.
Како што јави ДПА, на почетокот на минатата недела таа почна штрајк со глад поради лошите услови во иранските затвори.
На Мохамади денеска и беше дозволено да го напушти затворот за да оди на лекување, се вели во пораката објавена на Инстаграм профилот на активистката, кој го одржуваат нејзините роднини во странство. Ден претходно уште еднаш ѝ беше забранет пристап до медицинска установа со аргумент дека не ја покривала главата со хиџаб, кој е задолжителен во Иран. Засега не е јасно дали таа ќе остане во болница.
Активистката (51), која е меѓу најпознатите ирански бранители на човекови права, издржува долга казна во познатиот затвор Евин во Техеран. Оваа година Мохамади ја доби Нобеловата награда за мир за „нејзината борба против ограничувањето на правата на жените во Иран и нејзината борба да ги промовира човековите права и слободи за сите“.
