Цената на струјата за домаќинствата од денеска се намалува за 5,16 отсто за прв блок, за втор блок и за евтината тарифа останува иста, за трет блок поскапува за 2,88, а за четврт блок за 1,86 отсто при што цената за секој блок е збир од цена за активна електрична енергија плус мрежарина.
Тоа, според претседателот на Регулаторната комисија за енергетика и водни услуги и услуги за управување со комунален отпад (РКЕ) Марко Бислимоски, го овозможи воведувањето на надоместокот за пристап до мрежа од 200 денари месечно што од почетокот на годинава ќе го плаќаат сите корисници. Во спротивно доколку не се воведеше, како што вели, ќе имаше поскапување за 3,4 отсто во прв блок, за 8,62 во втор, за 9,46 во трет и за 4,92 отсто во четврт блок, додека евтината тарифа ќе се зголемеше за 15,42 отсто. Дополнително, надоместокот за пристап до мрежа овозможи намалување на мрежарината за речиси 23 отсто.
-Со новиот концепт пристап кон мрежа, се направи фер распределба на трошокот за мрежа меѓу редовните корисници и оние потрошувачи кои повремено ги користат објектите. Во моментите кога го имплементиравме надоместокот за пристап кон мрежа се водевме пред се на една од најбитните темелни вредности на нашиот Устав, тоа е социјалната правда. Со воведувањето на овој пристап кон мрежа овозможивме цената за мрежарина да се намали за речиси 23 проценти. Сето тоа ни овозможи да ги донесеме цените што ги објавивме, рече Бислимоски на прес-конференција, истакнувајќи дека одлуката е во насока на заштити стандардот на граѓаните.
Ова, додаде, е првата одлуката за цена што ја пресметуваше и ја објави во „Службен весник“ универзалниот снабдувач „ЕВН Хоум“, под контрола на РКЕ.
-Со ЕВН неколку пати одржавме состаноци и имавме забелешки во одреден дел околу факторот на корекција. ЕВН бараше да се примени поголем дел од факторот на корекција кој треба да се врати во наредниот период, а ние инсистиравме во оваа одлука факторот на корекција да биде нула. На крајот концептот РКЕ да врши контрола во носењето на одлуката на „ЕВН Хоум“ се покажа како правилен и беа прифатени нашите образложенија врз чија основа се донесе одлуката за цените, рече Бислимоски.
Посочи дека кај 80 проценти од домаќинствата веќе функционира евтината дневна тарифа во периодот од 13 до 15 часот што беше воведена од 1 декември минатата година.
Во првиот блок се домаќинствата кои трошат од 0 до 210 киловат часови електрична енергија месечно, во вториот од 210 до 630, во третиот од 630 до 1.050 и во четвртиот тие што трошат над 1.050 киловат часови месечно.
Според Бислимоски, некаде околу 80 проценти од домаќинствата се во првиот и во вториот блок. Смета дека со воведувањето на евтината дневна тарифа ќе се намали потрошувачката по блоковите, а за сметка на тоа ќе се зголеми во евтината тарифа каде цената е двапати поевтина од првиот блок. Тоа , како што вели, ќе значи дека и оние домаќинства кои влегуваат во третиот блок фактички ќе плаќаат помалку отколку досега.
