„За 25 месеци имаме 600 мегавати нови фотоволтаици, за производство на електрична енергија од фотоволтаици. Ја обезбедуваме од македонското сонце и со тоа уште повеќе си ја подобруваме нашата енергетска независност како држава. Очигледно е дека ако јагленот во изминатите 30-40 ја обезбеди нашата независност, сега тоа ќе биде македонското сонце и верувам во наредниот период и македонскиот ветер“ рече претседателот на Регулаторната комисија за енергетика, Марко Бислимовски во „Студио 10“ на ТВ24.
Тој додаде дека енергетиката ќе остане важна тема во општеството бидејќи се потребни нови инвестиции и сигурност во снабдувањето.
„РКЕ ќе направи се и понатака како што правеше досега да ги заштити граѓаните од ценовни шокови. Знаете какви беа претпоставките цената ќе се зголеми 50 посто, 200 посто, 40 посто. Но ние досега немавме такво поскапување. Три пати по ред ја намалувавме цената во првиот блок и од 1 декември воведовме евтина тарифа. Знаеме што правиме, знаеме каде одиме и апсолутно не се согласувам со ваков пристап кој што е на штета на граѓаните“ рече Бислимовски.
Тој додаде дека во сред енергетска криза, поради правилните политики не се покачи цената на електричната енергија за повеќе од 10 отсто.
