Набљудувачите на Обединетите нации забележаа ненадејно зголемување на цивилните жртви во Украина минатиот месец поради засилените напади на руските сили, соопшти денеска Канцеларијата на ОН за човекови права. Во март меѓу жртвите најмалку 57 деца се убиени или повредени, што е двојно повеќе од февруари, јави Хина.
Набљудувачката мисија на Обединетите нации за човекови права потврди најмалку 604 цивили убиени или повредени во Украина во март, што е за 20 отсто повеќе од февруари.
„Зголемувањето на цивилните жртви во март е главно резултат на нападите на руските вооружени сили кои користат ракети и експлозивни дронови низ Украина и зголеменото воздушно бомбардирање во близина на линијата на фронтот“, соопшти Канцеларијата за човекови права.
Мисијата откри дека повеќето цивилни жртви – 93,5 проценти – како и најмногу штети на образовните и здравствените установи и критичната инфраструктура се случиле во областите контролирани од владата.
Украина претрпе особено тешки напади минатиот месец, при што претседателот Володимир Зеленски кажа дека земјата може да остане без ракети за противвоздушна одбрана доколку Русија продолжи со својата интензивна кампања за бомбардирање со ракети со долг дострел. Минатата недела, тој прецизно соопшти дека само во март Русија истрела над 3.000 наведувачки бомби, лансирала 600 беспилотни летала и 400 проектили кон Украина.
