Израел ќе донесе одлуки за тоа како да се брани, изјави премиерот Бенјамин Нетанјаху, додека западните земји повикаа на воздржаност во однос на нападите од Иран, пренесува Ројтерс.
Соединетите Американски Држави, Европската Унија и групата индустриски развиени земји Г7 објавија планови за разгледување на построги санкции кон Иран, за кои се смета дека имаат за цел да го ублажат Израел и да го убедат да ја заузда својата одмазда за првите директни ирански напади по децениската конфронтација.
Нетанјаху се состана со германскиот и британскиот министер за надворешни работи, кои двајцата отпатуваа во Израел како дел од координираните напори за спречување на конфронтацијата меѓу Израел и Иран да ескалира во регионален конфликт поттикнат од војната во Газа.
Кабинетот на Нетанјаху соопшти дека тој им се заблагодарил на Дејвид Камерон и Аналена Баербок за нивната поддршка, притоа велејќи им: „Сакам да разјаснам – ние самите ќе донесеме одлуки, а државата Израел ќе направи се што е потребно за да се одбрани“.
Претходно, Камерон рече дека сега очигледно Израел планира да се одмазди за иранските ракетни и беспилотни напади, кои Техеран ги започна во саботата како одговор на претпоставениот израелски воздушен напад во кој загинаа воени офицери во неговата амбасада во Сирија.
Баербок рече дека ескалацијата „нема да послужи никому, ниту за безбедноста на Израел, ниту на многуте десетици заложници кои се уште се во рацете на Хамас, ниту на страдалното население во Газа, ниту на многуте луѓе во Иран кои и самите страдаат под режимот, ниту на трети земји во регионот кои едноставно сакаат да живеат во мир“.
Повеќе од шест месеци по војната во Газа меѓу Израел и палестинската милитантна група Хамас, поддржана од Иран, која доживеа разгорување низ Блискиот Исток, дипломатите бараат начин да ја спречат директната битка меѓу Израел и Иран.
Иранските ракети и беспилотни летала лансирани во саботата главно беа соборени од Израел и неговите сојузници и не предизвикаа смртни случаи. Но, Израел вели дека мора да возврати за да го зачува кредибилитетот на своите одвраќања. Иран вели дека смета дека работата е затворена, но повторно ќе возврати ако Израел го стори тоа.
Вашингтон вели дека планира да воведе нови санкции насочени кон иранската ракетна и беспилотна програма во наредните денови и очекува дека неговите сојузници ќе го следат примерот. Лидерите на ЕУ треба да разговараат за санкциите на самитот во Брисел, а санкциите се на дневен ред и на разговорите на Г7 во Италија.
М. П.
