Министрите од земјите членки на ЕУ задолжени за ресорите образование, млади, култура и спорт денеска и утре ќе се сретнат во Брисел за да разговараат за низа теми, меѓу кои и за младинските политики, примената и влијанието на вештачката интелигенција во образованието и културата, состојбата на медиумскиот систем во Унијата и планот за развој на спортот.
Заседанието на Советот за образование, млади, култура и спорт ќе започне со средба на министрите задолжени за млади на која треба да бидат одобрени заклучоците за плановите за развој на инклузивни општества за младите луѓе, за европските и меѓународните политички агенди за децата, младите и за правата на децата, како и за резултатите од Европската година на младите 2022. Предвидено е министрите да дебатираат и резултатите од Младинската конференција на ЕУ одржана на почетокот на март во белгискиот град Гент.
Советот продолжува попладне со средба на министрите задолжени за образование, кои се очекува да усвојат препорака на Советот на ЕУ за можности за мобилно учење за сите. Предвидено е тие да дебатираат за примената за вештачката интелигенција во образованието и обуките и да усвојат заклучоци за промоција на политика и пракса за нејзина примена врз основа на докази.
Заседанието продолжува утре се теми поврзани со културата и аудиовизуелните прашања. Во овој дел се очекува министрите задолжени за култура да усвојат заклучоци за зголеменото влијание врз медиумскиот систем и за начините за зајакнување на културните и креативни сектори во ЕУ. Предвидено е тие, исто така, да дебатираат за политиките за заштита на културните и креативните сектори во ерата на вештачката интелигенција.
Министрите задолжени за спорт, пак, се очекува да усвојат резолуција за Работниот план на ЕУ за спорт, како и заклучоци за поддршка на активни и здрави животни стилови. Дводневното заседание на Советот ќе заврши со дебата за улогата на волонтерите во европскиот спорт.
Во рамки на заседанието, на покана на претседателот на регионалната Влада и министер за култура, надворешна политика и развојна соработка на Фландрија, Јан Јамбон, европските министри задолжени за култура вечер ќе присуствуваат на работна вечера во Антверпен, на која ќе разговараат за заклучоците од конференцијата „Единство во различноста? Културата, наследството и идентитетот во Европа“, одржана во април во овој белгиски град, пред се во насока на улогата и придонесот на културата и наследството во изградбата на европскиот идентитет.
