Бугарскиот премиер Главчев по средбата со Мицкоски, нагласи дека „обврските за Северна Македонија остануваат да се исполнат
„Треба да се исполнат и обврските што се преземени. Тука не говорам само за Северна Македонија, туку и за сите земји од Западниот Балкан. Гледате дека не ги делиме. Нашата позиција е и европска позиција дека сите држави кандидати за членство во ЕУ треба да ги исполнат барањата што им се поставени“, рече вчера бугарскиот премиер Димитар Главчев од Вашингтон кој изјави дека имал средба со премиерот Мицкоски.
Тој посочи дека и двајцата се на исто мислење оти треба да се намалат тензиите и да се нормализираат билатералните односи меѓу двете држави.
Премиерот Мицкоски по повеќе од 12 часа утрово на својот фејсбук профил напиша дека „на маргините на официјалната фотосесија на лидерите на Влади и шефови на држави на НАТО самитот остварив кус разговор со премиерот на Бугарија, Димитар Главчев.
„Беше констатирано дека треба да се релаксираат односите, при што посочив дека треба да се гледа на иднината и да се користат можностите за соработка. Темите од минатото и отворањето на нови препреки нема да ги зближат двата народи и дека треба да се направат напори и чекори кои ќе влеат доверба меѓу државите како во периодот пред ветото и отпочнувањето на политиката на опструкции“, пишува Мицкоски.
Опозициската СДСМ претходно преку соопштение реагираше дека премиерот Христијан Мицкоски ја криел средбата со премиерот на Бугарија Димитар Главчев, која ја оствари на маргините на Самитот на НАТО во Вашингтон, додека ВМРО-ДПМНЕ, пак возврати дека нема тајни средби на јавен настан.
-Поминаа 14 часа откако бугарскиот премиер Главчев на долго и на широко раскажа за средбата со Христијан Мицкоски пред медиумите, а Мицкоски никаде го нема да ги соопшти ставовите од таа средба. Покрај протоколарните убави зборови, Главчев јасно ги повторилпозициите на Бугарија дека обврските за Северна Македонија остануваат. Дали Мицкоски го крие разговорот и се срами да соопшти како поминале неговите барања? Дали воопшто ги поставил барањата за промена на преговарачката рамка? Дали било што од ветувањата кои ги даде пред граѓаните во кампањата го покренал како прашање? Или повторно, по веќе не знаеме кој пат од преземањето на власта, си ја подвиткал опашката?, се наведува во соопштението на СДСМ.
Според партијата, Мицкоски и ВМРО-ДПМНЕ требаше да го искористат Самитот за зајакнување на македонските позиции во однос на Бугарија и Грција, но и други важни средби.
-Засега се што добивме се многу насмеани селфи фотографии од министрите, една веќе постоечка инвестиција и никаков успех на дипломатски план. ВМРО-ДПМНЕ секој ден покажува дека ништо од ветеното не планира да реализира ниту има капацитет за тоа, се додава во соопштението.
ВМРО-ДПМНЕ, пак, со одговор дека СДСМ објавува глупави соопштенија, во кои тврди дека се криела средба со бугарскиот премиер и додава дека нема тајни средби на јавен настан
-Глупави се соопштенијата на СДС каде наводно се тврди дека се криела средба со бугарскиот премиер Главчев. Нема тајни средби на јавен настан пренесуван во живо.СДС не треба да се грижи поминаа времињата кога премиерот Заев служеше за потсмев на меѓународна сцена додека тој самиот ја виткаше кичмата на Македонија и потпишуваше се што му ставаа на маса само за да го покрие криминалот на бате Вице и неговите блиски пајташи. Неговиот по криминал брат Филипче сега ја продолжува таа практика но за среќа прочитани се. Тие се грдото лице на едно поразено бреме, се вели во соопштението на ВМРО-ДПМНЕ.
Ј. Ѓ.
