Директорот на „Проект 2025“, конзервативна платформа за потенцијален втор мандат на Доналд Трамп, си даде синоќа оставка поради критики од конзервитивниот блок, вклучувајќи и од поранешниот претседател.
Пол Данс, поранешен советник во администрацијата на Трамп и вработен во Фондацијата „Херитиџ“, го водеше „Проект 2025“ – план за работа на можната идната администрација, и го обликуваше дискурсот околу тоа што конзервативците сонуваа дека би можеле да постигнат ако Републиканците се вратат во Белата куќа.
„Проект 2025“ предвидува радикално преобликување на федералната влада и американскиот живот, детално опишани во исцрпна книга од 900 страници, што стана омилен предмет за критика од страна на демократите, кои предупредуваат на враќањето на Трамп на власт.
Во изминатиот период Трамп го нападна „Проект 2025“, нарекувајќи некои од идеите „апсолутно смешни и ужасни“. Тој се трудеше да се дистанцира од работата, тврдејќи дека „нема идеја кој стои зад тоа“.
Високиот советник на Трамп, Крис Лачивита, неодамна ја нарече платформата „болка во задникот“ на кампањата на Трамп.
Повлекувањето на Данс беше потврдено од Кевин Робертс, претседателот на Херитиџ, институцијата која го промовира „Проект 2025“. Покрај повлекувањето од оваа платформа Данс, исто така, ја напушта и фондацијата.
-Под водство на Пол Данс, Проектот 2025 го заврши точно тоа што за што беше напишан: обединување на над 110 водечки конзервативни организации за создавање на обединета конзервативна визија, мотивирана за префрлање на моќта од неизбраната административна држава назад кон народот, рече Робертс.
Оваа алатка беше создадена во корист на секоја идна (конзервативна) администрација.
Лачивита и Сузи Вајлс, менаџери на кампањата на Трамп, изјавија дека тимот на Трамп „повеќе од една година дава до знаење дека „Проект 2025“ нема никаква врска со кампањата, не зборува за кампањата, и не треба да се поврзува со кампањата или со претседателот на кој и да било начин.“
