Претседателот на Собранието Африм Гаши денеска изјави дека интерпелацијата за него не е политички издржана. Осврнувајќи се на неколкуте забелешки и медиумски написи во изминатиот период, но и тврдења во самото барање за интерпелација, рече дека не направил никаква повреда на секуларноста, како и дека не побарал од никого да бидат прекршени меѓународните или домашните закони.
– Поднесена е интерпелацијата. Веднаш на првата седница ја ставивме, тоа ќе биде прва точка. Мене ми е мило што ќе се расправа и ќе и се објаснат на јавноста наводите што се поднесени во таа интерпелација. Се што е во рамки на Деловникот и во рамки на демократичноста во Собранието, го почитувам, било тоа да се однесува на институцијата претседател на Собранието или на било кого. Ќе бидеме отворени кон секоја иницијатива, ќе го почитуваме Деловникот и се надевам дека на 3 септември ќе има соочување на аргументи и потоа пленумот ќе одлучи. Како ќе одлучат тие, така ќе постапиме. Верувам дека мнозинството ќе ја донесе најправедната одлука. Таа каква и да биде, ќе ја почитувам, рече Гаши.
Претседателот на Собранието одговари на новинарски прашања за неговото приватно патување со службени возила на свадба во Косово.
Тој рече дека тој е обврзан како претседател на Собранието секаде да се движи со службено возило, иако не би сакал тоа да биде така.
Во врска со овој случај, Гаши кажа дека уредно бил најавен дека ќе патува на Косово, но дека, како што рече, не може да застане на пасошка контрола и да ги провери пасошите. Сепак, тој не кажа колку лица патувале со него со службените возила. Најави дека ќе покрене иницијатива и со Министерството за внатрешни работи да се доуредат одредени пропусти.
Од СДСМ велат дека „Гаши потврди дека одговорноста е кај Тошковски“.
– Претседателот на Собранието, Африм Гаши, денеска призна дека свадбарите со приватни возила на граничниот премин Блаце поминале без контрола од страна на полицијата и потврди дека одговорноста за тоа е кај Тошковски, кој е на чело на МВР, реагираат од СДСМ.
„Гаши ги потврди сите информации коишто ги објави СДСМ за пропустите и злоупотребите на граничниот премин Блаце и ја лоцираше одговорноста кај Тошковски. Потонати се сите обиди одговорноста да се префрли на некој раководител на смена. Рибата смрди од главата а глава на МВР е Панче Тошковски и тој мора да понесе одогорност. Ајде да видиме дали ќе охрабри сега Мицкоски да побара оставка од Тошковски? Ќе побара ли одговорност од Тошковски, ќе побара ли од било кого одоговрност за бројните скандали или ќе мјаука и понатаму во нивна заштита?“, се наведува во соопштението од СДСМ.
Ј. Ѓ.
