На 2 септември, О2 Иницијативата до пратениците во Собранието достави Предлог законот за изменување и дополнување на Законот за урбанистичко планирање, во насока на зголемување на транспарентноста на постапката на донесување на урбанистички планови и одобрување на урбанистички проекти со цел зголемено и навремено учество на јавноста, Советот на општината и со тоа намалување на ризиците од корупција.
Поддршка за предлог измените даваат следните граѓански организации: Транспаренси Интернешнл-Македонија, Go Green – биди зелен, Борба за Влае, Асоцијација за демократски иницијативи – АДИ, Евротинк – Центар за европски стратегии, Институт за човекови права, Институт за демократија Социетас цивилис Скопје, Коалиција сите за правично судење, Македонски центар за меѓународна соработка, Метаморфозис, Центар за граѓански комуникации и Центар за истражување и креирање политики.
„Врз основа на досегашното спроведување на законот се наметна потребата од промена на одредени одредби во Законот во насока на зголемување на транспарентноста на постапката на донесување на урбанистички планови и одобрување на урбанистички проекти со цел зголемено учество на јавноста, Советот на општината и на тој начин намалување на ризиците од корупција“, велат граѓанските организации.
Со овој предлог на закон ќе се изврши усогласување на Законот за урбанистичко планирање со Законот за локалната самоуправа и ќе се тргне можноста укинат урбанистички план повторно да се донесе без измена, што е причина за распуштање на Советот на општината, односно град Скопје.
Со овој предлог на закон ќе се доуреди утврдувањето на урбанистичкиот план од Советот на општината, односно град Скопје.
Се предвидува со Законот да се намали ризикот од корупција при донесување на урбанистичките планови со гласање на плановите со дво третинско мнозинство Во Советот на општината, односно град Скопје.
Доколку се изгласа со овој предлог на закон ќе се зголеми отвореноста и достапноста на информацискиот систем е-урбанизам за јавноста, со цел за навремено и точно информирање за постапката и сите потребни документи за донесување на урбанистички планови и одобрување на урбанистички проекти.
Д. Ј.
