Поранешниот шеф на Европската централна банка и италијанската влада, Марио Драги, предупреди дека постои лидерски вакуум во Европа, што произлегува од ослабеното лидерство во Франција и Германија.
„Француско-германското раководство е ослабено“, нагласи поранешниот италијански премиер Драги на церемонијата на доделување награди во Милано.
„Но, не гледам друго лидерство способно да ја води Европа кон заедничка иднина. Има лидерски вакуум, но мораме да бидеме трпеливи и да ги чекаме резултатите од изборите во Германија“, додаде тој.
Драги беше на чело на Европската централна банка од 2011 до 2019 година. Пред неколку недели тој објави извештај за иднината на Европската унија во име на тогашната Европска комисија. Во својот говор за време на доделувањето на наградите во Милано, Драги зборуваше и за „тешките времиња“ низ кои поминува Европа.
