Европската Унија и Албанија денеска во Брисел ја одржаа третата Меѓувладина пристапна конференција на која официјално беа отворени преговорите по Кластерот 6 – „Надворешни односи“.
Во рамките на овој Кластер се поглавјата 30 – „Надворешни односи“ и 31 – „Надворешна, безбедносна и одбранбена политика“. Ова е втор кластер од преговарачкиот процес што го отвора Албанија по кластерот 1 – „Основни вредности“, по кој преговорите започнаа на 15 октомври годинава.
Според унгарскиот министер за надворешни работи и трговија Петер Сијарто, одржувањето на денешната Меѓувладина конференција ЕУ-Албанија, која е втора за време на унгарско претседателство со Унијата, претставува уште еден конкретен чекор напред во пристапен процес на земјата.
– Овој напредок го одразува нашиот силен фокус на интеграцијата на Западниот Балкан, што е од суштинско значење за стабилноста и иднината на Европската Унија, нагласи Сијарто, чија земја е актуелен претседавач со Советот на ЕУ.
Албанскиот премиер Еди Рама, пак, оцени дека со отворањето на преговорите по втор Кластер, Албанија прави нов важен чекор со што го продолжува маршот кон ЕУ.
– Мораме да продолжиме и нашата мисија е да отвораме нови кластери, се надевам на пролет, и да постигнеме следната година да ја завршиме со повеќе отворени кластери. Така што, ова е навистина многу добар ден за нашата земја и многу мотивирачки чекор за сите нас, рече Рама, кој ја предводеше албанската делегација на Меѓувладината конференција.
Како претставник на Европската комисија, на Меѓувладината конференција присуствуваше и еврокомесарката за проширување Марта Кос.
Согласно новата методологија на преговарачкиот процес за членство во ЕУ, кластерот „Основни вредности“ се отвора прв, а се затвора последен, додека во меѓу време паралелно се одвиваат преговорите и по останатите пет кластери – „Внатрешен пазар“, „Конкурентност и инклузивен раст“, „Зелена агенда и одржливо поврзување“, „Ресурси, земјоделство и кохезија“ и „Надворешни односи“.
