Кинескиот претседател Си Џинпинг изјави дека Кина и Русија секогаш оделе „рака под рака“ на вистинскиот пат, објави денеска кинеската агенција Ксинхуа, неколку месеци откако двете земји се согласија за „нова ера на стратешко партнерство“ за клучните прашања.
Двајцата лидери во мај се согласија да ги продлабочат билатералните односи и да соработуваат за прашања од заеднички интерес, како што се Тајван, Украина и заедничкиот ривал САД.
Руските медиуми, исто така, ја цитираат изјавата на рускиот амбасадор во Пекинг од минатиот петок дека Си ќе ја посети Русија во 2025 година.
Разменувајќи ги новогодишните честитки со рускиот претседател Владимир Путин, Си ја пофали меѓусебната доверба и стратешката координација меѓу двете земји и изрази желба да одржува блиски врски со Путин.
„Кинеско-руската соработка на различни полиња ќе продолжи да води кон нови можности за развој’, додаде Си.
Кинескиот претседател во 2023 година беше примен во Кремљ како „драг пријател“, откако обезбеди невиден трет мандат на чело на државата.
