„Во Едно“ со Јане Ѓорѓиоски
1 Полни усти за членството на Македонија во Европската унија на премиерот Мицкоски и претседателката Сиљановска-Давкова за време на протоколарни средби, изјави за медиуми и пред дипломати. Тоа било наш врвен приоритет, па сме немале друга алтернатива, па било државен интерес. Сиљановска вели на крилјата на реформите ќе сме летале кон ЕУ, ќе сме се европеизирале. Па додава – „членството ќе биде моќен мотив за демократски промени во регионот, што трајно ќе овозможи крај на опасноста од дестабилизација и балканизација!“. И такви мити слични флоскули и празни зборови, митови и преданија се изнаслушавме овие шест месеци од државниот ни врв гордо македонски.
2 Од друга страна, излегува кој и да е официјален и неофицијален претставник од ЕУ и наши пријатели и буквално ни велат:
Луди ли сте, или што ви е?! Искористете го моментот на поволна клима во ЕУ во однос на проширувањето. Исполнете ја онаа смешна обврска за внесување на Бугарите во Уставот и терајте си капа накриво со отворање на кластери до полноправно членство. Ем излегувате кооперативни кај европските партнери, ем ги правите Бугарите уште посмешни во очите на Европа. Направете ги уставните измени и смејте им се на бугарските власти во лице. Паметна држава со зрели и одговорни политичари, така би направила. А ако им текне после на бугарчета да измислат друг проблем, ќе имате силен адут во рака. Нема да им помине! Ова ни го велат сите пријатели на Македонија, освен се разбира Орбан – пријателот од Мицкоски. А, Орбан што вели, Мицкоски тоа испорачува – бидете скраја од ЕУ држте се до мене.
3 Ќе барал Мицкоски „плусче“ да се додаде во Францускиот предлог. Ќе да е тоа што измислил Орбан. Жива смешка! Овој пат сами си го кочиме напредокот на граѓаните и државата, ЕУ не ни е виновна. Албанија со која бевме заедно, сега има да си бичи со напредок по кластери и ќе си користи поволни европски фондови во милиони евра. Црна Гора фура напред, во врат ни дишат Молдавија и Украина, а ние по се изгледа ќе си се дружиме со Косово и Вучиќ. Ма има да нè профураат и тие. Ќе си тапкаме во место, ќе јачаме гордост, ќе ни заминат уште неколку генерации во неповрат – а Мицкоски, Сиљановска и остала вмровска свита, е, тие ќе си товарат самарчињата со тендери, провизии од кинеско-унгарски кредити и ќе ни се потсмеваат на наивноста.
Во Едно: А каматата, каматата од сите овие нивни тралалајки што ги аминуваме – ние граѓаните сами ќе ја плаќаме, ич да не се секирате.
