Пратеничката група на ВМРО-ДПМНЕ се очекува до Собранието да поднесе иницијатива за изгласување на недоверба на членовите на Судскиот совет избрани од Собранието откако вчера ваква можност најави премиерот Христијан Мицкоски според кого потребно е формирање на нов Судски совет кој без партиски стеги ќе претставува монитор за тоа како судиите се однесуваат и какви одлуки носат. Ваквиот чекор, опозицијата го оцени како можност за партизација на Советот од страна на власта и побара следните чекори и реформи во правосудството да се прават со консензус на сите партии во законодавниот дом. За актуелниот претседател на Судскиот совет, секој може да поднесе инцијатива, но единственото место каде е предвидена постапка за разрешување е Законот за Судски совет.
Според Мицкоски, потребно е формирање на нов Судски совет којшто ќе може да го разбистри, како што вели, политичкото мочуриште и ќе претставува своевиден монитор за тоа како судиите се однесуваат, какви одлуки носат и зошто носат такви одлуки. Пред вчерашната средба со новинарите во Клубот на пратеници, тој оцени дека не може целосно да го распушти Советот, ниту пак, за кратко време да се детектираат аномалиите.
– Ние не можеме да направиме целосно распуштање, ниту пак можеме за така кратко време да ги детектираме аномалиите. Но, можеме да избереме Судски совет, којшто објективно без партиски стеги, без интереси, ќе може да го разбистри ова политичко мочуриште и да биде своевиден монитор на тоа како судиите се однесуваат, какви одлуки носат и зошто носат такви одлуки, рече премиерот.
Иницијативата која пратениците на ВМРО-ДПМНЕ ќе ја поднесат во законодавниот дом за изгласување на интерпелација на членовите на Судскиот совет, според Мицкоски ќе значи чекор кон длабоки реформи и ослободување на правосудниот систем од контроверзии и корупција.
Премиерот појасни дека и покрај тоа што ќе се изгласа интерпелација, тие ќе можат и понатаму да бидат дел од Советот, но, како што рече, кога тој што те избрал, ќе ти изгласа недоверба, тогаш не е добро да продолжуваш да водиш инает.
Доколку биде изгласана интерпелација, а членовите и понатаму останат во Советот, Мицкоски вели има други механизми, но, изрази надеж дека доколку парламентарците изгласаат недоверба на членовите на Судскиот совет, тие ќе бидат доблесни и ќе се повлечат.
За денеска најавена е прес-конференција на координаторот на пратеничката група на ВМРО-ДПМНЕ Никола Мицевски, а според најавите, темата е правосудство.
По најавата дека ќе биде поднесена иницијатива во законодавниот дом за изгласување на недоверба на Советот, вчера претседателот на Судскиот совет Александар Камбовски порача дека секој во Собранието може да поднесе иницијатива, но дека единствено место каде што е предвидена постапка за разрешување на членови на Судскиот совет е Законот за Судски совет.
– Во повеќе наврати сум дал изјави и мислења во поглед на постапката за разрешување на членови на Судскиот совет. Единствено место каде што тоа е предвидено е во Законот за Судски совет. Иницијативи може да се поднесуваат до Собранието, секој има право да поднесува иницијативи, рече Камбовски.
Прашан за тоа што доколку биде изгласана интерпелација на членовите на Советот, Камбовски рече дека не сака да шпекулира, бидејќи нема причина да се сомнева во Собранието и Владата дека работат согласно законите и Уставот.
– Сите работиме согласно закон и Устав. Немам причина да се сомневам дека и Собранието и Владата работат согласно на тие принципи, рече Камбовски.
Од опозициската СДСМ согласни се дека се потребни темелни реформи во правосудството кои ќе значат независно и ефикасно судство, но, нагласуваат дека не смее да се дозволи нова партизација од страна на власта.
– Потребни се темелни реформи на правосудството и тоа го очекуваат граѓаните. Но, реформи кои ќе значат независно и ефикасно судство кое ќе обезбеди правда. Не смее да дозволиме правдата која ја бараат граѓаните да се претвори во нова партизација и окупација преку смена на Судскиот совет од страна на власта, истакна вчера лидерот на СДСМ Венко Филипче во објава на Фејсбук.
Нагласи дека опозициската СДСМ бара следните чекори и реформи во правосудството да се прават со консензус на сите партии во Собранието.
– Потребен е национален, натпартиски пристап кој ќе обезбеди реформи согласно европските препораки. За тоа е потребно формирање на заедничка работна група во Собранието кое ќе ги дефинира, контролира и заеднички спроведува реформите во овој чувствителен сегмент. Доколку ВМРО-ДПМНЕ има искрена намера, ова ќе го прифати. Во спротивно ќе значи дека имаат сосема различни намери, напиша Филипче на Фејсбук.
