Во центарот на Париз утрово се поставени 20 ковчези во знак на сеќавање на судбината на украинските новинари убиени или затворени во Русија, во пресрет на третата годишнина од руската инвазија на Украина.
Ковчезите се поставени на Плоштадот на Републиката од триесетина активисти на невладината организација Репортери без граници (РСФ).
– Во време кога се зборува за прекин на огнот, украинските новинари се испрашуваат, мачат и понижуваат во руските затвори. Новинари кои само си ја вршат работата. Ова е неприфатливо, изјави генералниот директор на Репортери без граници, Тибо Брутин,.
Отворените ковчези ги претставуваат 19-те украински новинари приведени од Русија, од кои некои се во затвор повеќе од 10 години. Додека едниот затворен ковчег со венец и свеќи, е за новинарка Викторија Рошчина, која почина во руски затвор под неразјаснети околности на 19 септември 2024 година.
– Овие новинари се во опасност, нивните животи се загрозени. Се надеваме дека нема да мораме да ги затвораме овие ковчези, наведе Брутин.
Репортери без граници ги повика Украина и Европска Унија да побараат ослободување на овие 19 новинари.
Според невладината организација, 11 новинари се убиени во Украина од почетокот на руската инвазија на 24 февруари 2022 година.
