Премиерот Христијан Мицкоски вчера се обрати на Конференцијата за конзервативна политичка акција (CPAC) во Вашингтон, каде што беше интервјуиран од политичката коментаторка Кеј Ти Мекфарланд, поранешна заменик-советничка за национална безбедност во првиот мандат на претседателот Трамп. Во интервјуто, Мекфарланд истакна дека Мицкоски бил единствениот европски лидер кој позитивно реагирал и аплаудирал за време на говорот на американскиот потпретседател Џеј Ди Венс на Минхенската безбедносна конференција минатата недела. Во тој говор, Венс жестоко ги критикуваше европските држави.
Мицкоски го опиша говорот на потпретседателот Венс како „историски настан“ и „инспиративен говор“. Тој истакна дека, иако некои европски политичари можеби ќе се налутат на неговото мислење, смета дека Венс бил во право. Мицкоски посочи дека по говорот, дел од публиката го критикуваше Венс, сметајќи го неговото обраќање како мешање во внатрешните работи на суверени држави. Сепак, Мицкоски нагласи дека Македонија, во својата историја, направила значајни промени, како што се промена на знамето, валутата, Уставот и името, за да ги исполни стратешките цели за членство во НАТО и ЕУ, поради притисоци од соседните земји. Тој праша дали тоа не претставува мешање во внатрешните работи на суверена земја.
Премиерот Мицкоски исто така истакна дека Македонија е целосно усогласена и ја поддржува политиката на претседателот Трамп, особено во однос на одбраната, со издвојување над 2% од БДП за одбранбени потреби. Тој ја нагласи и важноста на Македонија во справувањето со илегалната миграција, опишувајќи ја земјата како „врата на југоисточна Европа“ и истакнувајќи дека Македонија била на „линијата на фронтот“ во борбата против илегалната миграција, штитејќи ја Европа од илегалните мигранти.
-Македонците се многу традиционални, ги сакаат своите семејства, можеби сме малку, но македонската заедница во САД е многу важен дел од американското општество. Знам дека го подржаа претседателот Трамп за време на изборите, тие се конзервативци и знам дека ќе продолжат да го поддржуваат претседателот Трамп, рече Мицкоски.
Ј. Ѓ.
