Пратеничката група на СДСМ најави поднесување на нов закон во Собранието, кој предвидува зголемување на платите во приватниот сектор без дополнителен финансиски товар за работодавачите. Според ова законско решение, платите на работниците би можеле да се зголемат за износ од 3.000 до 15.000 денари без обврска за плаќање придонеси на тој дополнителен дел.
„Се соочуваме со реален проблем – платите се уште се ниски, а трошоците за живот растат. Со оваа мерка, директно ќе им помогнеме на работниците и ќе создадеме поволна економска клима за компаниите“, изјави пратеничката на СДСМ, Сања Лукаревска, на денешната прес-конференција.
Како ќе функционира мерката?
Според предложениот закон, работодавачите во приватниот сектор ќе можат да исплаќаат повисоки плати без да плаќаат дополнителни придонеси за пензиско, здравствено и социјално осигурување. Придонесите ќе останат замрзнати на просекот од последните три исплатени плати, а оваа мерка ќе важи во период од една година.
Кој ќе биде опфатен?
Законот се однесува на работници чии нето плати не надминуваат 65.380 денари. Според проценките на СДСМ, оваа мерка би можела да опфати околу 400.000 работници.
Ако просечното зголемување на платата биде 7.500 денари, тогаш вкупното покачување на платите на национално ниво би изнесувало 585 милиони евра годишно. Дополнително, иако за зголемениот дел од платата нема да се плаќаат придонеси, државата ќе наплати 58,5 милиони евра од данокот на личен доход.
Очекувани ефекти
Според СДСМ, предложеното законско решение ќе има позитивни ефекти врз работниците, компаниите и државата:
- Работниците ќе добијат повисоки плати и подобрен животен стандард.
- Компаниите нема да бидат дополнително оптоварени со давачки, што ќе ги охрабри да инвестираат во своите вработени.
- Државниот буџет ќе добие дополнителни приходи од данокот на личен доход.
„Оваа мерка е паметна, правична и издржана. Очекуваме парламентарното мнозинство и Владата да ја поддржат, бидејќи нема оправдување за нејзино одбивање“, порача Лукаревска, додавајќи дека ако власта не го поддржи законот, тоа би значело спротивставување на подобрувањето на економската состојба на граѓаните.
СДСМ најави дека ќе бара итна процедура за усвојување на законот и ги повика сите пратеници да го поддржат во интерес на работниците и економијата на земјата.
– СДСМ во изминатиот период докажа дека минималната може и мора да се зголемува и тоа го правевме со соодветни законски решенија. Сега гледаме дека цените постојано растат, животниот стандард на граѓаните континуирано опаѓа, владата не нуди никаква економска политика којашто ќе значи повисоки плати за работниците, и ликвидност на компаниите. Гледаме дека ефектите коишто ги имаа кошничките не го дадоа резултатот, нема никакви ефекти, одговарајќи на новинарско прашање, истакнаЛукаревска.
Таа нагласи дека СДСМ „секогаш биле на страната на работниците и да се зголеми платата, така да ја поддржуваме борбата на синдикатите за 500 евра минимална плата“.
– Сите наши економски мерки коишто ги поднесовме во изминатиот период како и оваа денеска одат во интерес на зголемување на платите на граѓаните, односно на работниците, потенцира Лукаревска.
