На денешната прес-конференција на СДСМ, партискиот портпарол Богданка Кузеска откри загрижувачки информации во врска со функционирањето на Државниот инспекторат за труд, обвинувајќи ја актуелната влада за хаос во институциите и грубо кршење на законите.
Според Кузеска, од 28 февруари трудовите инспектори формално не се вработени бидејќи се одјавени од Агенцијата за вработување, што значи дека работат без правен основ, односно „на црно“. Оваа ситуација, како што потенцираше таа, ја компромитира целата инспекциска работа и ги прави сите извршени контроли незаконски.
„Инспекторите кои треба да се борат против сивата економија, самите се ставени во состојба да работат без никаква правна основа. Владата на Христијан Мицкоски ги доведе во ситуација тие да работат без договор, што е скандалозно и недозволиво“, изјави Кузеска.
Дополнително, таа информираше дека инспекторите со задоцнување ја добиле платата за декември 2024 година – дури на 12 февруари оваа година, додека платите за јануари и февруари 2025 година сè уште не се исплатени. Ова значи дека инспекторите немаат ниту здравствено осигурување, што е, според СДСМ, директно загрозување на нивните работнички права.
„Замислете, тие што треба да ги штитат работниците, сега самите се оставени без никаква заштита, без плата и без осигурување. Ова се парадоксите на новото нормално на ДПМНЕ“, додаде Кузеска.
СДСМ потсети дека проблемот со статусот на инспекторите е последица на измените на Законот за организација и работа на органите на државната управа, за кои партијата предупредувала уште минатата година. И покрај тоа што два пати се правеле законски измени, проблемот не е решен, а администрацијата е доведена во состојба на хаос.
„Бараме власта веднаш да го реши проблемот, сите инспектори да бидат повторно пријавени и да им се исплати платата. Овој хаос не смее да продолжи, а за него мора да има одговорност“, порача Кузеска.
