„Ние работниците се бориме за корка леб, тие политичарите за гола политика. Борбата за зголемување на работничките плати е чиста работничка борба!“, објави претседателот на ССМ, Слободан Трендафилов, на својот Фејсбук профил, откако премиерот Христијан Мицкоски го отфли предлогот за зголемување на минималната плата за 100 евра, и притоа го наклевети првиот синдикалец дека е продолжена рака на СДСМ, Левица и ДУИ.
Минималната плата треба да се зголеми овој месец. Согласно законот, зголемувањето би требало да биде околу 1.800 денари, а синдикатот бара зголемување за 6.000 денари и придонесите за разликата до 30.000 денари, колку што би изнесувала минималната плата, да ги субвенционира Владата.
Премиерот Христијан Мицкоски истакна дека пари во Буџетот за оваа намена не се планирани. За него е прифатливо секое решение што ќе го договорат синдикатите и работодавачите, но со целосно подмирени трошоци од страна на работодавачите. Мицкоски рече дека жали што синдикатот се претворил во гласноговорник на опозицијата.
„Жалам што Сојузот на синдикати на Македонија полека, но сигурно, се претвора во партиска бина или гласноговорник на коалицијата Левица, СДСМ и ДУИ и практично тоа што овие го говорат во Парламентот, тие го говорат на прес-конференции. Тие одбрале таков начин да функционираат. Жалам што во минатото изостана овој предлог. Тие мислат дека сега ќе го исцрпат Буџетот и дека ние ќе дадеме 100-200 милиони денари за нив, нема за улици, градинки, училишта, канализации…, рече Мицкоски по посетата на општина Илинден (05.03.2025).
И од ВМРО-ДПМНЕ, чиј лидер е премиерот Мицкоски, го спорат легитимитетот на претседателот на ССМ Слободан Трендафилов, посочувајќи дека е избран на нелегален начин.
„СДС го постави Слободан Трендафилов на чело на ССМ. Тој молчеше додека на власт беа СДС, а сега глуми синдикалец. Трендафилов е избран за претседател на ССМ на еден крајно насилен начин, со изигрување на прописите, велат од ВМРО-ДПМНЕ.
Од СДСМ прашуваат како е можно од најголемиот буџет во историјата од 6 милијарди евра да нема пари за поголеми плати на работниците?
„Како тоа има пари за авиони за владата а нема пари за 500 евра минимална плата? Додека граѓаните едвај врзуваат крај со крај, додека илјадници работници живеат во сиромаштија, владата на ДПМНЕ има пари за авиони и привилегии за функционерите, но не и за зголемување на минималната плата. Мицкоски дефинитивно потврди дека е против раст на платите и против достоинствен живот на работниците. Со тоа, уште еднаш покажа дека ДПМНЕ нема никаква намера да ги поддржи работниците, туку исклучиво да се грижи за елитата“, велат од СДСМ.
Претседателот на ССМ, Трендафилов на Фејсбук ги отфрли обвинувањата на Мицкоски и ВМРО-ДПМНЕ дека е партиска бина и продолжена рака на опозицијата.
„За едните бев портпарол на ВМРО, за другите сум портпарол на СДСМ, и нивната перцепција секогаш зависи од позицијата во која се наоѓаат, односно дали се на власт или се во опозиција. ССМ работи за работниците, а ВМРО и СДСМ можат слободно да се обвинуваат меѓусебно, имајќи во предвид дека и едните и другите кога беа на власт беа и се против работниците. Борбата за зголемување на работничките плати е чиста работничка борба, напиша Трендафилов.
Претседателот на Сојузот на Синдикатите на Македонија (ССМ), Слободан Трендафилов е оптимист и очекува да има средба со премиерот Христијан Мицкоски за зголемување на минималната плата.
ССМ во понеделникот (3 март) побара зголемување на минималната плата од 6.000 денари со што таа би достигнала до 30.000 денари, а работодавачите една година да бидат ослободени од социјалните придонеси, односно придонесите да ги субвенционира државата.
Според претседателот на ССМ, созреано е времето социјалните партнери да си подадат рака и да го унапредат животниот стандард на работниците, но и да го сочуваат квалификуваниот кадар. Секој глас против зголемување на платите, како што истакна претседателот на ССМ, е глас за купување билет во еден правец и напуштање на државата.
„Апелирам до Владата и работодавачите да го прифатат предлогот на ССМ, а пратениците, како што беа сложни за нивните патни трошоци, да гласаат за дополнително зголемување на минималната плата за 6 000 денари што ќе значи и дополнително зголемување на сите остантати плати на работниците во Македонија. Ние не правиме упад во даночната политика, напротив. Со тоа што ќе добиеме зголемени плати нема да заминеме во банките за да ги штедиме тие средства што сме ги добиле како зголемување, туку со нив ќе ги купиме основните прехранбени производи кои се даночат со стапка од 5, 10, 15 или 18 отсто, рече Трендафилов.
Зависно каква одлука ќе донесат Владата и работодавачите, ќе зависи и како понатаму ќе делува ССМ. Синдикатот најавува штрајк доколку не се прифати нивниот предлог.
„Ако некој одлучи да биде безобразен, ќе бидеме двојно безобразни, ако некој одлучи еднострано да ја отфрли иницијативата или предлогот за зачувување на животниот стандард на работниците, еднострано можеме да донесеме одлука за штрајк“, подвлече Трендафилов на прес-конференција во понеделникот.
Дехран Муратов / Цивил Медиа
