Францускиот министер за одбрана денеска ќе ги прими своите колеги од четири други европски воени сили, Германија, Италија, Полска и Велика Британија, за да ги „координираат акциите за поддршка на Киев“, соопшти француското Министерство.
Петмина министри за одбрана ќе се сретнат во Париз еден ден по состанокот на началниците на генералштабовите на европските земји подготвени да го гарантираат идниот мир во Украина, организиран од францускиот претседател Емануел Макрон, пренесуваат француските медиуми.
-Во време кога европските шефови на држави постојано повторуваа дека мирот во Украина треба да се наметне со сила и со оглед на неодамнешната одлука на САД да ја прекине воената помош за Украина, министрите ќе разговараат за координирање на активностите на нашите земји за поддршка на Киев, изјави францускиот министер за одбрана, Себастиен Лекорну.
Министрите, како што е наведено, ќе разговараат и за неопходното дополнително вооружување на Европа и нивните земји, потребно за да се обезбеди долгорочна колективна безбедност.
Ова е третпат министрите за одбрана на петте земји да се сретнат лично во ваков формат, по првата средба во Берлин во ноември, а втората во Полска во јануари.
Емануел Макрон, заедно со британскиот премиер Кир Стармер, во координација со украинскиот претседател Володимир Зеленски и неколку други европски лидери, се обидуваат да развијат мировен план со кој би се избегнало преговорите меѓу САД и Русија да завршат со прекин на огнот без никакви гаранции.
Макрон веќе најави во телевизиско обраќање во средата дека во вторник следната недела ќе ги прими европските началници на генералштабови. Целта е можно распоредување на европски сили во Украина кои нема да се борат на првите линии, туку ќе гарантираат почитување на мирот откако ќе се потпише мировниот договор, рече тогаш Макрон.
Францускиот претседател во последните неколку дена се обидува заедно со британскиот премиер да го преземе водството во развојот на одбраната на европскиот континент, во време кога претседателите на САД и Русија, Доналд Трамп и Владимир Путин се се поблиску.
