Министерот за здравство Арбен Таравари денеска соопшти дека нема да биде склучен договор со „Ѓока констракшн“, фирмата од Албанија која требаше да стопанисува со паркингот на Клинички центар.
Таравари посочи дека се разгледуваат две опции за стопанисување со паркингот.
-Првата е ЈП Градски паркинг да изгради две катни гаражи и да ги управува, а втората е тоа да го направи Службата за општи и заеднички работи при Клинички центар, рече Таравари.
Организацискиот секретар на СДСМ, Мартин Костовски на денешната прес-конференција рече „се потврдува дека Министерството за здравство и министерот Арбен Таравари уште од самиот почеток за оваа зделка за „Ѓока Констракшн“, се откажале од 99% од приходите и ги оставиле на приватната компанија.
„Значи за приватна компанија 99% од приходите, а за државата само мизерен 1%! Или во бројки. За годишен приход од 3,5 милиони евра од паркингот на Клнички центар, за државата би биле само 35.000 евра а за приватна компанија 3.465.000 евра. Е затоа овој скандал е огромен. Документите кои ги криеше Таравари го потврдуваат она во што се соменваше СДСМ. Самото Министерство за здравство поставило услов концесионерот да плаќа само 1% од приходите на државата! Таравари и Мицкоски свесно решиле паркингот да го предадат на приватна фирма, оставајќи ја државата без приход, додека пациентите ќе плаќаат речиси двојно поскапо паркирање! Ова е јасен доказ дека целата постапка е сомнителна и дека некој од власта дебело профитира од оваа зделка на грбот на граѓаните! Но тоа не е сè. Од докуметните во оглаот се гледа дека еден од условите за учество на тендерот бил компанијата да има изградено мостови! Каква врска има изградбата на мост со поставување монтажни гаражи во Клиничкиот центар?! Ова е основен сомнеж дека тендерот бил специјално скроен за „Ѓока Констракшн“, компанијата што го има изградено мостот „Ваша“ во Албанија. Со овој сомнителен услов, Владата оневозможила реална конкуренција и обезбедила однапред познат победник“, истакна Костовски.
Тој вели дека „сега откако се фатени живи и скандалот изби во јавноста од Владата најавуваат дека немало да го потпишат договорот.
„Не е доволно сега само да не се потпише договорот. Мора да има истрага за корупција и одговорност. Мора да постапат и ДКСК и Јавното обвинителство. Ова е скандал без преседан, вакво распродавање на државниот имот на штета на граѓаните и пострашно, на пациентите не е запаметено“, рече Костовски.
Медиумите минатата недела објавија дека приватниот оператор од Албанија „Ѓока Констракшн“ е единствена компанија која се јавила на повикот за јавно-приватно партнерство. Ако го добие договорот, ќе биде обврзана да инвестира во катни гаражи, но ќе може да наплаќа паркирање по цена од 50 наместо 30 денари од час, а за возврат на државата ќе треба да и префрли само 1 отсто од годишните приходи.
