Астрономите открија збирка на ситни галаксии лоцирани на приближно 3 милиони светлосни години оддалеченост, што ја вклучува најмалата и најбледата галаксија што некогаш е видена.
Истражувањето на тимот беше објавено на 11 март во The Astrophysical Journal Letters.
Оваа галаксија, означена како Андромеда XXXV, и нејзините „сонародници“ кои орбитираат околу нашата соседна галаксија, Андромеда, би можеле да го променат начинот на кој размислуваме за космичката еволуција.
Тоа е затоа што толку малите џуџести галаксии требало да бидат уништени во потоплите и погусти услови на раниот универзум. Сепак, некако, оваа мала галаксија преживеала.
„Ова се целосно функционални галаксии, но тие се околу еден милионити дел од големината на Млечниот Пат. Тоа е како да имаш совршено функционално човечко суштество со големина на зрно ориз“, рече во изјавата член на тимот и професор на Универзитетот во Мичиген, Ерик Бел.
Самите џуџести галаксии не се ништо ново за научниците. Нашата галаксија, Млечниот Пат, е орбитирана од десетици сателитски галаксии.
Меѓутоа, има многу работи за џуџестите галаксии што научниците не ги знаат. Тоа е затоа што, бидејќи се помали, тие се многу помрачни од големите галаксии, што ги прави потешки за забележување и потешки за проучување на големи растојанија.
Додека астрономите беа во можност да утврдат многу џуџести галаксии во орбитата околу Млечниот Пат, идентификувањето на џуџестите галаксии околу нашите светли галактички соседи беше неверојатно тешко. Ова значи дека џуџестите галаксии на Млечниот Пат биле нашиот единствен извор на информации за малите сателитски галаксии.
Оваа задача е нешто помалку предизвикувачка околу најблиската голема галаксија до Млечниот Пат, Андромеда. Други џуџести галаксии биле забележани околу Андромеда и порано, но тие биле големи и светли, со што едноставно се потврдуваат информациите што астрономите ги собрале за џуџестите галаксии околу Млечниот Пат.
За да ги откријат овие помали и помрачни џуџести галаксии кои ја менуваат парадигмата, водачот на тимот Маркос Ариас, астроном од Универзитетот во Мичиген, и неговите колеги пребаруваа различни масивни астрономски збирки податоци. Тимот исто така можеше да добие време со вселенскиот телескоп Хабл за да им помогне во потрагата.
Ова откри дека не само што Андромеда ХХХВ е сателитска галаксија, туку е и доволно мала за да ги промени теориите за тоа како еволуираат галаксиите.
„Беше навистина изненадувачки. Тоа е најбледото нешто што ќе го најдете наоколу, така што е само некако уреден систем. Но, исто така е неочекувано на многу различни начини“, рече Бел.
Ј. Ѓ.
