„Свесни сме дека судството со години наназад предизвикува незадоволство поради спори постапки и сомнеж за големо политичко влијание. Сакам да кажам две работи – првата е дека немам намера да стојам во одбрана на одредени личности и второ, ниту една влада во изминатите три децении не направила доволно за да се случат вистински реформи во правосудството, што граѓаните го заслужуваат, сакаат да го видат и поради тоа има огромен гнев“, изјави претседателот на СДСМ, Венко Филипче, на денешната прес-конференција.
Тој рече дека е недозволиво и недемократски тој гнев да се користи за судството да се присвои, како што се обидува да направи ВМРО-ДПМНЕ.
„Се поставува прашањето дали ВМРО-ДПМНЕ сака да стави партиска капа врз судството за да заштити некои свои неправилности и криминали, кои секој ден ги откриваме“, рече Филипче.
Претседателот на СДСМ додаде дека заканите на премиерот дека ќе се случел народ на судството е порака и признание дека Мицкоски сака судство само по своја мерка и дека не сака ниту подобро, ниту независно судство.
„На некој начин таа изјава е оксиморон, односно со партиски протести ќе се борат против, наводно, партизирано судство. Нема поголем доказ од тоа дека крајната цел е партизација“ заклучи Филипче.
Тој рече дека вистински промени се можни само со вистински реформи, а не со притисоци и закани.
„Ги повикувам уште еднаш, целата владејачка коалиција и ВМРО-ДПМНЕ и ЗНАМ и Влен, да се вразумат и да го почнат патот на реформите“, изјави претседателот на СДСМ, Венко Филипче, на денешната прес-конференција.
Тој додаде дека решенијата за реформи во правосдуството се спремни и на маса, работени заедно со претставници на ЕУ и преточени во Реформската агенда и Планот за раст кој го подготви владата на СДСМ, а го потпиша премиерот Мицкоски пред неколку месеци во Брисел.
„Таму се содржани повеќе закони, меѓу кои и закони кои се однесуваат на обвинителството и на судскиот совет и за платите на судиите и движење на судски предмети. Работи кои треба да се случат за да се стави ред во тој систем и да фунцкионира согласно европските норми и критериуми, а кај граѓантие да се врати довербата“ рече Филипче.
Тој додаде дека законите се спремни и СДСМ е подготвена да ги поддржи сите закони кои се во Реформската агенда и да ги гласа заедно со владејачкото мнозинство.
„Дополнително што тие закони се поврзани со финансиски средства и грантови. Целокупниот пакет е 800 милиони евра помош за Македонија. Но, за жал од триесетина закони кои се во планот да се донесат до јули 2025, само еден е донесен, ниту еден друг не е во собраниска процедура“, изјави Филипче.
На новинарско прашање за синдикатите, Филипче ијзави дека Владата е тука за да ги решава проблемите, а не да ги критикува барањата на синдикатите и да ги бележи дека се обоени со ваква или таква боја или да бараат некакви конекции.
Д. Е.
