Американскиот претседател Доналд Трамп воведе нови царини за увоз на европски автомобили, тврдејќи дека ЕУ ги блокира американските марки од нивниот пазар, но експертите од индустријата велат дека вистинскиот проблем се самите автомобили.
Трамп воведе царина од 25 отсто за увезените автомобили, тврдејќи дека додека САД увезуваат милиони европски возила, извозот на американски автомобили во ЕУ е „речиси невозможно“.
Сепак, аналитичарите тврдат дека новите тарифи веројатно нема да ги подобрат перформансите на американските производители на автомобили во Европа, бидејќи нивните модели не се усогласени со преференциите на локалните потрошувачи.
-Тесла е редок исклучок, рече Стефан Брацел од Центарот за автомобилски менаџмент, но компанијата се соочува со опаѓање на продажбата и зголемени критики на нејзиниот главен извршен директор, Илон Маск, кој исто така служи како советник на Трамп. Во првиот квартал, испораките на Тесла паднаа за 13 отсто.
Минатата година, Германија испорача речиси 450.000 автомобили во САД, додека само 136.000 американски автомобили беа продадени во Германија, според германското здружение за автомобилска индустрија ВДА.
Пред воведувањето на тарифата од 25 отсто, САД имаа само 2,5 проценти царина за автомобили од Европа, додека стапката на ЕУ за американските возила е 10 посто.
Индустрискиот експерт Фердинанд Дуденхофер, исто така, ја посочува големината и потрошувачката на гориво на возилата во САД како клучни пречки, бидејќи цените на горивото во Европа се значително повисоки отколку во САД.
Без помали модели со поекономична потрошувачка на гориво, Дуденхофер верува дека американските производители ќе продолжат да се борат во Европа, без оглед на тарифните политики.
