Американската разузнавачка заедница во моментов истражува дали Федералното биро за истраги (ФБИ) било вклучено во планирањето на нападот на Капитол на 6 јануари 2021 година.
Ова го изјави Џозеф Кент, шеф на кабинетот на директорката на Националното разузнавање (ДНИ) Тулси Габард, за време на сослушувањето во Сенатот за неговата номинација за директор на Националниот центар за борба против тероризмот.
– Во моментов истражуваме, рече Кент, без да прецизира која од 18-те американски разузнавачки агенции ја води истрагата.
Габард, кој неодамна беше именувана за шефица на ДНИ, исто така ги надгледува разузнавачките функции на ФБИ.
Иако независниот извештај на надзорното тело на Министерството за правда објавен во декември ги отфрли теориите на заговор на екстремната десница за тајната вмешаност на ФБИ во нападот, тој потврди дека 26 доушници на ФБИ биле во Вашингтон тој ден. Сепак, во извештајот се заклучува дека никој од нив немал дозвола да влезе во зградата на Капитол или да учествува во насилството.
Изјавите на Кент уследија по прашањето на демократскиот сенатор Марк Кели, кој потсети дека приврзаниците на Доналд Трамп се обиделе да го спречат Конгресот да ја потврди изборната победа на тогашниот претседател Џо Бајден во 2020 година, која Трамп лажно ја прогласи за изборна кражба.
Кент, поранешен член на Зелените беретки и ЦИА, познат по својата лојалност кон Трамп, претходно на социјалните мрежи изнесе тврдења дека ФБИ и други агенции биле вклучени во планирањето на нападот, нарекувајќи го настанот „разузнавачка операција“. За време на сослушувањето, Кент сугерираше дека канцеларијата на ФБИ во Вашингтон „веројатно“ играла улога, но додаде дека тоа е „предмет на истрага“.
