Висок палестински функционер запознаен со преговорите за прекин на огнот меѓу Израел и Хамас изјави за Би-Би-Си дека катарските и египетските посредници предложиле нова формула за ставање крај на војната во Газа.
Според официјалниот претставник, тој предвидува примирје кое ќе трае меѓу пет и седум години, ослободување на сите израелски заложници во замена за палестинските затвореници во израелските затвори, формален крај на војната и целосно израелско повлекување од Газа.
Висока делегација на Хамас требаше да пристигне во Каиро на консултации.
Хамас на дискусиите во Каиро ќе биде претставен од шефот на неговиот политички совет, Мохамед Дарвиш, и неговиот главен преговарач Калил ал-Хаја.
Тоа доаѓа неколку дена откако движењето го отфрли последниот предлог на Израел, кој вклучуваше барање Хамас да се разоружа во замена за шестнеделно примирје.
Израел не го коментираше планот на посредниците.
Последниот прекин на огнот пропадна пред еден месец кога Израел продолжи со бомбардирањето на Газа, при што двете страни меѓусебно се обвинуваат за неуспехот да се одржи.
Д. Мишев / ЦивилМедиа
