Над 2.400 тркачи од 31 држава од светот денеска учествуваат на трките од пет и од 21 километар на деветтото издание на спортската манифестација „Охрид трчаТ“.
Заради безбедноста на тркачите и публиката ќе има времен режим на сообраќај од 7 часот и 45 минути до 11 часот и 15 минути ќе бидат затворени за сообраќај улиците: „Кеј Македонија“, „Македонски Просветители“, „Партизанска“, „Јане Сандански“, „Димитар Влахов“, „Туристичка“, „Абас Емин“, „Кирил и Методиј“, „Илинденска“, „Коста Абраш“, патека Студенчишта и „Св. Наум Охридски“.
„Охрид трчаТ“, според Јоне Станкоски од организацискиот тим на манифестацијата, не е само спортска трка, туку е спортско-туристички производ, кој го слави животот, здравјето, заедништвото.
Годинава, според него, интересот е најголем во споредба со претходните изданија, а половина од учесниците се од странство или други градови на Македонија.
– „Охрид трчаТ“ има длабока вредност за локалната заедница, не само заради тоа што го промовира здравиот начин на живот, туку и затоа што директно влијае врз локалната економија, преку исполнети сместувачки капацитети, посетени ресторани, локални бизниси… Градот овој викенд ќе живее со трката и тоа е резултат на посветена работа и визија, истакна на прес-конференција Станкоски.
Ваквите настани, за градоначалникот на Охрид Кирил Пецаков, се многу значајни за промоција на градот.
– Ако погледнеме наназад секоја година бројката на учесници се зголемува, што ни дава за право да кажеме, Охрид, секоја година е се поатрактивен и трката е таа што ги привлекува огромниот број не само наши, туку и странски туристи. Ме радува и што половина од тркачите се од други градови од Македонија или од странство. Сметам дека овој тренд во иднина ќе продолжи, рече Пецаков.
Иван Цветкоски од организацискиот тим на „Охрид трчаТ“ истакна дека посветено работат цела година за овој викенд да го реализираат онака како што заслужува еден град како Охрид.
– Охрид ние го третираме како голема скапоценост и се трудиме тоа да го оправдаме, кај сите тркачи кои доаѓаат за време на манифестацијата. Имаме 2.400 учесници, 510 полумаратонци од кои 50 отсто се странци, имаме 70 штафетни тркачи на штафетниот полумаратон. Бројките
покажуваат за се што сме работеле изминатата година, рече Цветкоски.
Годинашната манифестација „Охрид трчаТ“ почна во петокот со експо и ноќна трка, вчера се одржа панел дискусија и други спортски и забавни настани.
