Промената на режимот во Иран не е дел од ставот одобрен од Европската унија, рече портпаролот на Европската комисија одговарајќи на новинарско прашање. Тој додаде дека трајната безбедност се постигнува преку дипломатија, а не преку воени дејствија.
Според него, ЕУ бара сеопфатен политички пристап кон Иран за решавање на сите отворени прашања.
Европската унија отсекогаш била на мислење дека Иран никогаш не треба да се здобива со нуклеарно оружје. Техеран развива такви капацитети кршејќи го меѓународното право и ова го оцени Меѓународната агенција за атомска енергија, истакна портпаролот.
По вчерашниот вонреден онлајн состанок на министрите за надворешни работи на ЕУ, високата претставничка на Европската унија за надворешна политика и безбедност, Каја Калас резимираше дека никој нема корист од ескалацијата на конфликтот во регионот.
Таа повика на почитување на меѓународното право, на покажување воздржаност и на избегнување дејствија со непредвидливи последици на Блискиот Исток.
