Иранскиот парламент гласаше во среда за суспендирање на соработката на земјата со нуклеарниот надзорник на ОН, Меѓународната агенција за атомска енергија (МААЕ), објави државниот медиум IRIB, пренесува Си-ен-ен.
Одлуката на Иранското исламско консултативно собрание, познато како Меџлес, сега ќе треба да биде ратификувана од Врховниот совет за национална безбедност, со кој претседава претседателот Масуд Пезешкијан.
Гласовите на Меџлес, особено кога се однесуваат на надворешни работи, често се сметаат за симболични, освен ако не се поддржани од помоќното тело избрано од врховниот лидер Али Хамнеи. Во неделата, по нападите на САД врз иранските нуклеарни постројки, парламентарниот комитет за национална безбедност и надворешна политика му предложи на законодавното тело Ормутскиот теснец, кој се наоѓа на јужниот брег на Иран, да биде затворен. Таа одлука на крајот ќе биде донесена и од Врховниот совет за национална безбедност.
МААЕ инсистираше на продолжување на односите со Иран, прекинати поради невидените напади на Израел врз нуклеарните постројки во земјата, почнувајќи од 13 јуни.
Во вторник, надзорниот орган објави соопштение во кое го поздравува крајот на 12-дневниот конфликт, велејќи дека „инспекторите на МААЕ останаа во Иран во текот на целиот конфликт и се подготвени да почнат со работа што е можно поскоро, враќајќи се на нуклеарните постројки во земјата и проверувајќи ги залихите на нуклеарен материјал – вклучувајќи повеќе од 400 кг ураниум збогатен до 60% – што последен пат го проверија неколку дена пред почетокот на израелските воздушни напади на 13 јуни.
Си-Ен-Ен контактираше со МААЕ за дополнителни коментари.
Д. Мишев / Цивил Медиа
