БРАНКО ТРИЧКОВСКИ
Во стручна смисла, делото на Кардула можеме да го објасниме со влијанијата на арт деко, на виенската сецесија, на Густав Климт посебно, на јапонската графика, со минимализмот како стил, и со компјутерот и маусот како техника.
Малку понародски, неговото дело е неверојатен коктел од применета, популарна, елитна и модерна уметност.
И во вечерва отворената изложба во МОБ под наслов „Флора имагинариум”, во неговата фантастична естетика доминира жената, но во бајковитиот контекст на цветови, листови, гранчиња и други елементи на нашата флора.
Преку единствената техника што ја користи во изразот, Кардула е ретка можност за поширока восприемност и комуникативност на високата естетика, модерноста на дизајнот и на ликовната уметност.
Ова е ексклузивна уметност, но не уметност на затворените кругови на посветените кои се најчесто лажни.
Тој е единствен човек кој така посветено ја негува врската, традицијата и наследството на антифашизмот како основа на македонската држава и нација, со сето свое етничко, културно, верско и јазичко богататво.
Како и југословенско извориште и контекст.
Повеќеслојноста на неговиот ангажман и на неговата уметност, на Зоки како човек, се гледа и во филигранскиот однос кон граѓанското културно наследство од македонското преддржавие и потоа, особено на влашката заедница во Македонија и на нејзините врски и оставштини преку истакнати личности на целиот Балкан, па и во Европа.
Кардула не е амбасадор на македонската култура затоа што политичките интереси ја кастрираа таа култура и ја понароднија односно примитивизираа, тој е индивидуалец, бренд, марка, за себе и само преку себе и својата посебност тој зрачи пошироки значења, меѓу другите и национални и државни. На Балканот и во Европа. Тие зрачења се последица на неговата уметност, а не цел.
Затоа и говориме за уметност. За ретка појава денеска кога царува глупоста и примитивата од највисоко ниво па да под земја.
Му честитам на Зоки и му посакувам нови творечки изблици, а на неговата прекрасна фамилија се најдобро.
Фото: Ј. Ѓорѓиоски / Фронтлајн
