Потпретседателката на СДСМ и актуелен кандидат за градоначалничка на Скопје, Каја Шукова, денеска и официјално ја објави својата кандидатура, истакнувајќи дека влегува во трката со чувство на чест, но и голема одговорност.
„Денес стојам пред вас со силно чувство на чест, но и голема одговорност. Ви благодарам на сите кои изминатите денови ми дадовте доверба и поддршка да бидам кандидат за градоначалничка на градот во кој сум родена, порасната, каде го формирав своето семејство и кој го сакам со сето срце,“ изјави Шукова, нагласувајќи: „Се кандидирам да бидам градоначалничка на сите скопјани. Независно дали сте поддржувачи на СДСМ, на ВМРО-ДПМНЕ, на некоја трета партија или на ниту една, за мене сите граѓани се еднакво важни.“
„Скопје е украден град – не смееме тоа да го дозволиме повторно“
Шукова упати силна критика до досегашната локална власт предводена од ВМРО-ДПМНЕ, велејќи дека во изминатите четири години градот бил доведен до „историско дно“:
„Четири години со ВМРО-ДПМНЕ видовме што значи безредие, неодговорност и непочитување на граѓаните. Што значи политички инает на сметка на здравјето на граѓаните, бизнис интереси на сметка на развојот на градот, власт која е подготвена да го уништи градот само за сопствен политички интерес.“
Таа додаде дека Скопје денес изгледа „како украден град, ставен во заложништво“, со разурната инфраструктура и без основна функционалност.
Пристап без лажни ветувања
Шукова најави дека нејзината кампања нема да биде заснована на „шарени програми“ и „мега проекти“, туку на конкретни, остварливи решенија:
„Скопјани бараат уредено, културно, чисто Скопје. Бараат градоначалник со јасна визија и конкретен план. Без чуда, без лажни мега проекти и шарени програми на стотици страници.“
Клучните приоритети
Меѓу клучните приоритети кои Шукова ги наведе се:
-
Чистење на градот и воспоставување на функционални претпријатија за управување со отпадот;
-
Чист воздух и здрава средина, како области во кои има лично искуство и експертиза;
-
Обнова на јавниот превоз за град достапен и функционален за сите;
-
Запирање на урбанистичкиот хаос и враќање на контрола на граѓаните врз урбанизмот;
-
Ревитализација на постојната инфраструктура и дигитализација на услугите;
-
Враќање на културата и урбаниот дух на Скопје;
-
Обнова на безбедноста на улиците – „секој ден и секој чекор мора да биде безбеден и удобен“.
„Најлесно е да им се поклониш на моќните, а тешко е да им служиш на сите. Јас го бирам тоа што е тешко, ама исправно,“ рече Шукова.
Град за луѓето, не за интересите
Шукова истакна дека веќе се работи на програмата и дека тоа нема да биде затворен документ, туку отворен процес кој ќе ги вклучи граѓаните и стручната јавност:
„Ги повикувам да ни се приклучат најдобрите, најмотивираните луѓе кои искрено го сакаат градот. Скопје има врвни професионалци во сите области, токму тие ќе бидат столбот за враќање на сјајот на градот.“
Таа ја заврши прес-конференцијата со порака дека акцијата веќе започнала:
„Скопје не смее да чека. И јас нема да чекам. Ова не е само кампања – ова ќе биде заедничко враќање на Скопје на граѓаните.“
